Barymtashylar iri qarany myltyqpen atyp, jaıylymnan urlaǵan
TALDYQORǴAN. QazAqparat - Almaty oblysynda bir top barymtashy sıyrlardy atyp óltirip, jaıylymnan urlaǵan, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, jedel aqparatty tekserý barysynda polıtseıler jaıylymdardaǵy sıyrlardy atqan barymtashylar tobyn qolǵa túsirdi. Tárkilengen ańshy myltyqtary da zańdy tirkelmegeni anyqtaldy.
«Aqjar aýylynyń mańynda ornalasqan jaıylymnan eki sıyrdyń urlanǵany týraly aqparatty alǵan soń, kúdiktilerdiń qaıtý jolyn joramaldap, tuzaq uıymdastyrdyq. Alaıda, barymtashylar óte saq qımyldady. Eki jeńil avtokólik arqyly urlanǵan oljany tasymaldaǵan olar polıtseılerdi kórip, seziktengen. Saqtyq úshin kúdiktiler beketke jetpeı sıyr etin túsirip, ony jasyrǵan. Alaıda, júksiz ketip qalýǵa tyrysqan kúdiktiler ustaldy», - deıdi Almaty oblysy Qaratal aýdandyq polıtsııa bóliminiń bastyǵy Raýan Abdraımov.
Avtokólikterdi tekserý barysynda qan izi bar eki uńǵyly ańshy myltyǵy jáne basqa da dálelder tabyldy. 23,25, 29 jáne 34 jastaǵy tórt kúdikti urlyq jasaǵadaryn tolyq moıyndap, soıylǵan sıyrlardy jasyrǵan oryndaryn kórsetti.
«Ustalǵan azamattardyń 2018, 2019 jáne 2020 jyldary jasalǵan iri qara urlyǵynyń taǵy bes epızodyna qatystylyǵy dáleldendi. Kúdiktiler etti bazarlarǵa jáne óziniń tanystaryna ótkizgen, al túsken aqshany jeke qajettilikterine jumsaǵan. Qylmystyq toptyń barlyq qatysýshylary qamaýǵa alyndy. Al olarǵa mal etin tasymaldaýda kómektesken avtokólik arnaıy turaqqa qoıyldy», - dep tolyqtyrdy R.Abdraımov.
