Barymtashy óriste júrgen eki sıyrdy atyp alǵan
PAVLODAR. QazAqparat - Sharbaqty aýdanynda djıp kóligimen ońaı olja tabýdy kózdegen barymtashysy ustaldy.
Oblystyq ІІD baspasóz qyzmetiniń málimetinshe, 58 jastaǵy kúdikti «Toyota Prado» avtomashınasymen jolda qaraýsyz jaıylymda júrgen maldardy urlaý maqsatynda Sharbaqty aýdany jaqqa shyqqan, dep habarlaıdy pavlodarnews.kz .
«Ol Kólbulaq aýylynan eki shaqyrym jerden sıyrlardyń baqylaýsyz júrgenin ańǵarǵan soń tabynǵa jaqyndap, eki sıyrdy atyp alǵan. Qylmystyń izin jasyrý maqsatynda tabyndy ári qaraı aıdap jibergen de atyp qulatqan sıyrdyń tutas etin shóppen jaýyp qoıǵan. Budan keıin mal soıatyn qural-jabdyqtardy ákelý úshin Pavlodar qalasyna attanǵan, - deıdi baspasóz qyzmetinde. Sol kúni túngi saǵat 22.00 shamasynda atyp alynǵan eki maldy aıdalada soıyp alǵan barymtashy «ToyotaPrado» avtomashınasynyń júksalǵysh bóligine artyp alyp qala jaqqa shyqqan. Alaıda maldyń etin ótkize almaǵan. Polıtsııa qyzmetkerleri kúdiktilerdi «Maraldy stantsııasy - Pavlodar qalasy» tas jolynda qolǵa túsirdi. Tártip saqshylary avtomashınanyń salonynan oq-dári, bınokl, qol ara, eki balta, pyshaq, dóńgelek qaıraq, «S22KM» ıir oıyqty karabın jáne eki iri qara maldyń qyzyl, qyzyl-aq tústi terisin anyqtady. Atalmysh fakti boıynsha QR QK 188-babyna sáıkes sotqa deıingi tergep-tekserý júrgizilýde. Kúdikti qamaýǵa alyndy. Sonymen qatar, ustalǵandar alty mal urlaý faktisi boıynsha kúdikke ilingen.
Aıta keterligi, 2017 jyly ótkizilgen is-sharalardyń nátıjesinde mal urlaýmen aınalysqan 17 qylmystyq toptyń joly kesilip, 63 adam qolǵa tústi. Olardyń barlyǵy ártúrli qylmystyq jaýapkershilikke tartyldy.
