«Bartoǵaı» sý qoımasy qurǵaqshylyq daǵdarysynan aman qaldy
NUR-SULTAN. QazAqparat – «Bartoǵaı» sý qoımasy qurǵaqshylyq daǵdarysynan aman qaldy. Bul týraly jýrnalısterge arnalǵan press-týr barysynda «Qonaev atyndaǵy Úlken Almaty kanalynyń» dırektory Serikqalı Muqataev málim etti, dep habarlaıdy QazAqparat Sý komıtetine qarasty «Qazsýshar» RMK baspasóz qyzmetine silteme jasap.
Onyń aıtýynsha, bıylǵy egin-terim naýqanynda qýańshylyqqa baılanysty birqatar qıynshylyqtar oryn alǵan. Máselen, syıymdylyǵy 320 mln tekshe metr bolatyn Úlken Almaty kanalyna keletin sý ádettegiden 212 mln tekshe metrge az bolǵan. Sondyqtan, kanal basshylyǵy sharýa qojalyqtaryna beriletin sýarmaly sý kólemin normaǵa saı kemitken. Buǵan deıin keı aımaqtarda mólsherden artyq sýarmaly sý alyp kelgen ýchaskelerdiń sý alý tártibi rettelip, beriletin sý mólsheri sekýndyna 100 tekshe metrden 80 tekshe metrge deıin azaıtylǵan. Mamandar ár sharýa qojalyǵynyń egistik alqap kólemin, egiletin egin túrin eskere otyryp, beriletin sýdyń normasyn shyǵarǵan. Osy sharalardyń arqasynda sý qoryn 13 mln tekshe metrden 28 mln tekshe metrge deıin ulǵaıtyp, Bartoǵaı sý qoımasynda qurǵap ketý qaýpin seıiltken.
«Shilde aıynda sý odan saıyn azaıa bastaǵannan keıin, biz sý aınalymyn engizdik. ıAǵnı, bes kún Shelek pen Bartoǵaıǵa sý berdik, bes kún Úlken Almaty kanalyna berdik. Biz osy kezeńde olarǵa tolyq kólemde sý berdik. Osy sýdyń arqasynda olar birinshi sýarylymyn ótkizdi. Osylaısha barlyq ekken eginderi aman qaldy. Al 10 kúndik sý aınalymyn engizý arqyly 13 mln tekshe metr sýdy 28 mln tekshe metrge deıin kóterip, Bartoǵaı sý qoımasyna sý jınap aldyq. Osylaısha sý daǵdarysynan aman-esen óttik. Bul der kezinde qabyldanǵan sheshim boldy. Ol sý aınalymyn engizbegende, Bartoǵaıda áldeqashan sý taýsylyp qalar edi»,- dedi Serikqalı Muqataev.
Sondaı-aq, búkil Orta Azııa elderinde oryn alyp otyrǵan qýańshylyq pen sý muzdyqtarynyń erýine baılanysty sharýalardyń egis alqaptaryn aman alyp qalý úshin, egin alqaptaryndaǵy kókónis mólsherin azaıtyp, qurǵashylyqqa tózimdi, ári sýdy az tutynatyn aýyl sharýashylyǵy ónimderin kóptep ósirý týraly usynys jasalǵan.
«Biz sharýalarǵa usynys jasadyq. Kóktemde qandaı kókónister men egin ekseńizder durys bolady, al qandaı egin túri shyqpaı qalýy yqtımal ekenin aıttyq. Óıtkeni, vegıtatsııalyq kezeńniń basynda «Qazgıdromet» bizge aqparat berip, qýańshylyq bolatynyn málim etti. 45 protsentke sý az bolatynyn eskertti. Bizdiń bólimshe aqpan aıynda aýyl jáne aýdan ákimderine hat jiberdi. Sý tapshy bolatynyn aıtyp, egindi soǵan saı egýlerin suradyq»,- dedi Úlken Almaty kanalynyń» dırektory.
Óz kezeginde aýyl sharýashylyǵy ónimderin ósirýmen aınalysatyn sharýalar da «Qazsýshar» RMK qarasty «D.Qonaev atyndaǵy Úlken Almaty kanalynyń» ujymyna alǵysyn bildirdi. Máselen, elıtalyq tuqymdy soıa men júgeri ósiretin «Býdan» sharýa qojalyǵynyń jetekshisi Ermek Óskenbaev qıyn kezeńde sýsyz qaldyrmaǵan kanal mamandaryna alǵysyn aıtty.
«Bıyl qurǵaqshylyq bolyp otyr. Ol tabıǵattyń zańy. Biraq bizdiń Úlken Almaty kanaly ujymynyń jaqsy eńbeginiń arqasynda biz jaqsy nátıjege jettik. Biz júgerini aryqpen sýaramyz. Tamshylatyp sýarý ádisin qoldanbaımyz. Júgeriniń tamyry jan-jaqqa jaıylady. Sondyqtan júgeri ýaqytynda sý ishpese, ónim bolmaıdy. Al, ÚAK ujymy ýaqtyly, qansha sý kerek, mysaly 500 lıtr sekýndyna deseń, sonsha kólemde sý berip otyr. Olar sharýalardyń suranysy men yńǵaıyna qarap, jumys istep jatyr. Sý kanaldan shyqqansha, arna mamandary jaýap beredi. Al, onyń aýmaǵynan asqannan keıin sharýalar óz arnasyn tazartyp otyrý kerek. Sonda ǵana sý durys keledi»,- dedi Ermek Óskenbaev.
Al 1982 jyldan beri Almaty irgesinde alma ósirýmen aınalysyp kele jatqan «Sabır» qojalyǵynyń basshysy Ismaıl Tomazov bolsa, «D.Qonaev atyndaǵy Úlken Almaty kanaly» mamandarynyń táýlik boıy kezekshilik atqaryp, kestege saı sý berýiniń arqasynda qýańshylyqtan aman shyqtyq dep otyr.
«1985 jyldan bastap, kanal ashylǵaly beri sý alyp kelemiz. Kanal kelisimsharttaǵy óz mindetin tolyq oryndap otyr. Biz de ýaqytynda aqshasyn tólep otyrmyz. Eger kanal bolmaǵanda biz kúzdik jemisterdi ǵana ósiretin edik. Qazir barlyq múmkinshiligine saı jumysyn istep, bizge jaǵdaı jasap otyr. Sýsyz ómir bolmaıdy ǵoı. Tabysymyzdyń 50-60 paıyzy osy arnanyń jumysyna baılanysty»,- dedi I.Tomazov.
Osylaısha «D.Qonaev atyndaǵy Úlken Almaty kanalynyń» mamandary vegıtatsııalyq kezeńde «Bartoǵaı» sý qoımasyna 70 protsent nemese 212 tekshe metrge sýarmaly sýdyń az kelýine qaramastan sý qoımasyn qurǵaqshylyqtan aman alyp shyǵyp, aýyl sharýashylyǵy ónimderin óndiretin sharýalardy egin-terim naýqany aıaqtalǵansha, sýmen qamtamasyz ete alatyn deńgeıge qol jetkizgen. Qazirgi tańda osy atqarylǵan jumystardyń arqasynda «D.Qonaev atyndaǵy Úlken Almaty kanalynda 20 mln tekshe metr sý bar. 11 tamyzdan bastap sýarmaly sý burynǵy tártip boıynsha suralǵan mólsherge saı berilip otyr.
