Bartoǵaı sý qoımasynyń bógeti seısmoturaqtylyq turǵysynan rekonstrýktsııalanbaq
ALMATY. KAZINFORM — Sý resýrstary jáne ırrıgatsııa mınıstri Nurjan Nurjigitov Almaty oblysyna jumys saparymen baryp, birqatar kezdesý ótkizdi. Bul týraly vedomstvonyń baspasóz qyzmeti málim etti.
Іle aýdanynda vedomstvo basshysy oblys ákimi Marat Sultanǵazıevpen birge jeke qabyldaý ótkizip, azamattardyń óńirdegi ırrıgatsııalyq kanaldardy rekonstrýktsııalaý jáne Kúrti men Bartoǵaı sý qoımalaryndaǵy sý kólemine qatysty suraqtaryna jaýap berdi.
Sondaı-aq mınıstr jergilikti turǵyndarmen eseptik kezdesýde Almaty oblysynda atqarylyp jatqan jumystar men sý sharýashylyǵyn damytýǵa baǵyttalǵan aldaǵy josparlar týraly baıandady. Búginde óńirde 11 joba iske asyrylyp jatyr, onyń 10-y ırrıgatsııa jáne sýarý máselelerine qatysty. Sonymen qatar Qarasaı aýdanynda toptyq sý qubyrynyń qurylysy júrip jatyr.
Bıyl aıaqtalatyn eki joba aıasynda 12 481 gektar sýarmaly jerge sý jetkizýdi jaqsartý maqsatynda tozyǵy jetken ırrıgatsııalyq jáne drenajdyq júıeler qalpyna keltiriledi.
– 2028 jylǵa deıingi sý salasyn damytý jónindegi keshendi josparǵa sáıkes, oblysta eki jańa sý qoımasyn salý kózdelip otyr. Sonymen qatar Bartoǵaı sý qoımasynyń bógetin seısmoturaqtylyq turǵysynan rekonstrýktsııalaý jumystary júrgiziledi. Budan bólek, úsh sý qoımasyna kúrdeli jóndeý jasaý, 2636 shaqyrymnan astam ırrıgatsııalyq kanaldy rekonstrýktsııalaý jáne 270,3 shaqyrym kanaldy avtomattandyrý, sondaı-aq 74 gıdrotehnıkalyq nysandy kópfaktorly zertteý josparlanǵan, – dedi Sý resýrstary jáne ırrıgatsııa mınıstri Nurjan Nurjigitov.
Mınıstr baıandama jasap, Almaty oblysyndaǵy Sorbulaq jınaqtaýshy kóliniń jumysyna, magıstraldi kanaldardy rekonstrýktsııalaý merzimderine jáne Islam damý bankiniń qoldaýymen júzege asyrylatyn josparlanǵan jobalarǵa qatysty turǵyndardyń suraqtaryna jaýap berdi.
Aıta keteıik, Jetisý oblysynda segiz jańa sý qoımasy salynady.