Barsha qazaqstandyq azamattar prezıdenttik «Qazaqstanda jasalǵan» aktsııasyna qoldaý kórsetýi tıis - depýtattar pikiri

ASTANA. QazAqparat - Barsha qazaqstandyq prezıdenttik «Qazaqstanda jasalǵan» aktsııasyna qoldaý kórsetýi tıis. Bul pikirdi búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Parlamenti Senatynyń depýtaty Serik Nógerbekov bildirdi.

«Bul aktsııany barsha qazaqstandyqtar qoldaýy tıis. Óıtkeni, memleket tarapynan kórsetilgen qoldaý sharalary bizdiń kásiporyndarymyzdyń aıaǵynan tik turyp, básekege qabiletti bolýyna jaǵdaı jasady. Sondyqtan biz barlyǵyn osy aktsııany qoldaýǵa shaqyramyz», - dedi ol BAQ ókilderiniń saýalyna oraı.

Al Senat depýtaty Olga Perepechına óziniń tek qazaqstandyq sút jáne et ónimderin satyp alatyndyǵyn basa aıtty.

«Qazirgi qarjylyq qıyn kezeńde kez kelgenimiz óz eliniń patrıoty retinde dúkennen Qazaqstanda jasalǵan ónimderdi ǵana satyp alýymyz kerek dep oılaımyn. ıAǵnı, qazaqstandyqtar óz óndirýshilerine jan-jaqty qoldaý kórsetýi tıis. Men tutynýshy retinde qazaqstandyq ónimniń sapasyn óte joǵary baǵalaımyn. Azyq-túlik ónerkásibi salasynda bizde sapasy óte joǵary ónimder jetkilikti. Máselen, men tek qazaqstandyq sút jáne et ónimderin satyp alamyn», - dedi ol.