Barsha qazaq maqtanysh etetindeı taǵy bir qalanyń salynyp jatqany qýantady – Bekarys Shoıbekov

TÚRKІSTAN. QazAqparat – Elimizge tanymal aıtysker Bekarys Shoıbekov kıeli shahardyń oblys ortalyǵyna aınalyp, kórkeıip jatqanyna qýanatynyn jasyrmady. Aqynnyń aıtýynsha, qazaq eli maqtanysh etetindeı taǵy bir qala salynyp jatyr, dep habarlaıdy QazAqparat tilshisi.

«Túrkistan - Qazaq memleketi tarıhynyń tiri kýásine aınalyp otyrǵan qala ekeni belgili. Sondyqtan da Elbasymyz byltyr Túrkistandy oblys ortalyǵy etip jarııalap, jańa oblys quryldy. Sodan beri jańa nysandar salynyp, qurylys jumystary kúndiz-túni júrip jatyr. «Túrkistan - jańa qala» degen arnaıy joba jasalyp, onda jumystar toqtaýsyz júrip jatyr. Munyń barlyǵy kóńilimizge qýanysh uıalatady. Bul tek elimizdi kórkeıtip qana qoımaıdy, sondaı-aq Túrkistandaǵy ıÝNESKO-nyń Áziret Sultan kesenesi sııaqty jaýharlarymyzdy álemge tanytýǵa zor múmkindik der edim»,- deıdi aqyn Bekarys Shoıbekov.

Aıtyskerdiń sózinshe, kúni keshe ǵana Memleket basshysy Qasym-Jomart Toqaevtyń «Túrkistan eń kórikti qalalardyń birine aınalady» degen sózi túrkistandyq jurtshylyqqa qanat bitirgen. Prezıdenttiń tarıhı qalaǵa erekshe kóńil bólip, ondaǵy barlyq jumystardy óz baqylaýyna alýy kóńil qýantady.

«Túrkistanda joldar jóndelip, aryqtar tazalanýda. Qalanyń kireberis qaqpasy jańartylyp, kógaldandyrylyp jatyr. Munyń barlyǵy bizge, túrkistandyq turǵyndarǵa úmit pen shabyt syılaıdy. Bárimiz de jańadan salynyp jatqan qaladaǵy jumystardyń tezirek aıaqtalyp, shahardyń jasaryp-jańǵyrǵanyn yjdahattylyqpen kútýdemiz. Jańa ózgergen qalany kórýge asyqpyz. Buıyrtsa qazaq eli maqtanysh etetindeı taǵy bir qala paıda bolady»,- deıdi aıtysker aqyn.

Eske sala keteıik, Úkimettiń keńeıtilgen otyrysynda Memleket basshysy Qasym-Jomart Toqaev Túrkistan elimizdegi eń kórikti qalanyń birine aınalatynyn aıtqan bolatyn.