Barsha qazaq elin qýantqanym úshin baqyttymyn — álem chempıony Fatıma Supyǵalıeva
ORAL. KAZINFORM — Ekvadorda dzıýdodan jasóspirimder arasynda ótip jatqan álem chempıonatynda batysqazaqstandyq, 16 jastaǵy Fatıma Supyǵalıeva 52 kelige deıingi salmaqta jeńimpaz atandy. Qazaqstan tarıhynda dzıýdodan qyzdar arasynda alǵash ret osyndaı ataqqa qol jetkizgen sportshymen Kazinform tilshisi habarlasqan edi.
— Fatıma Altynbekqyzy, kúlli Qazaq elin qýantqan erekshe tabysyń qutty bolsyn! Buǵan qalaı jettim dep oılaısyń?
— Árıne, buǵan tynymsyz eńbek pen udaıy jattyǵýdyń arqasynda jettim dep oılaımyn. Óz ómirimde ákem Altynbektiń orny erekshe. Kishkentaıymnan osy dzıýdo kúresine baýlyp keledi. Sodan keıin ekinshi bapkerim, ákemniń shákirti Erlan Ońalovty aıtar edim. Ol Ekvadorǵa menimen birge bardy. Meni qoldap, durys baǵyt berip otyrdy. Aǵaıym bolmasa, seskenip, basqasha kúreser me edim. Ol kisi bolǵannan keıin eshteńege alańdamaı, sabyrmen shyqtym. Eń bastysy, barsha qazaq elin qýantqanym úshin baqyttymyn.
Ekvadorǵa barar aldynda Shymkent qalasynda oqý-jattyǵý jıynynda boldyq. Quramadaǵy ahýal óte jaqsy, bári de jaqsy bappen jetti.
— Ekvador — Ońtústik Amerıkada ornalasqan alys el. Aýa raıyna beıimdelý ońaıǵa túspegen shyǵar?
— Iá, klımatqa úırený qıyn boldy. Ýaqyt aıyrmashylyǵy da bar, mysaly, qazir Qazaqstanda saǵat 20.00 bolsa, munda tańǵy 10.00.
— Osy álem chempıonatyndaǵy beldesýlerińdi eske túsireıikshi. 1/32 fınalda Lıýksembýrg ókili Soýkaına Moreıradan aılańdy asyrdyń. Odan keıin meksıkalyq Konstansa Akosta Klaýdıony qapy qaldyrdyń. Shırek fınalda aýstralııalyq Rıka Hıroseni jeńdiń. Jartylaı fınalda ızraıldik ıAlı ıAhavtan óttiń. Fınalda ýkraınalyq Ksenııa Kırılchýkty qosymsha ýaqytta taza túsirgenińdi búkil álem kórdi. Osynyń qaısysy qıyn boldy?
— Muny bólip-jaryp aıta almas edim. Jekpe-jektiń bári de men úshin ońaıǵa túsken joq. Áıteýir bárine birdeı nyq senimmen shyqtym.
— Qazaqstandyq qyzdar arasynda tuńǵysh álem chempıony bolǵan sátte qandaı sezimge bólendiń?
— Áser keremet. Artymda qalǵan qalyń eldiń úmitin aqtaǵanyma qýandym. Qazaqstanymyzdyń kók baıraǵy jelbirep, Gımn oryndalǵan sátte keýdemdi maqtanysh sezimi kernedi.
— Endeshe, jeńisińdi kimge arnaısyń?
— Jeńisimdi ákeme arnaımyn. Ol men úshin ómirdiń bar ystyq-sýyǵyna tózip keledi. Ózi de kúrespen aınalysqan sportshy, keıin bapker bolǵannan keıin meniń jolymnyń ońaı emestigin biledi. Osy saparǵa shyǵar aldynda da: «Qyzym, saǵan senemin, senen myqty eshkim joq, ne isteý kerektigin óziń de bilesiń ǵoı», dep jiger berdi.
Jasóspirimder arasyndaǵy álem chempıonaty komandalyq jaryspen aıaqtalady. Oǵan qatyspaımyn, meniń salmaǵym joq. Qyzdar 48, 63, +70, uldar 60, 81 jáne +90 kelide tatamıge shyǵady. Sodan keıin elge qaıtamyz.
— Alda qandaı jarystar bar?
— Qarasha aıynda Senegal astanasy Dakarda jasóspirimder arasynda olımpıada dodasy ótedi. Onda da el namysyn qorǵaý úshin barymdy salamyn.
— Áńgimeńe rahmet, Fatıma, jeńister tileımin.
Eske sala keteıik, budan buryn jasóspirimder Azıadasynyń chempıony maqsaty olımp bıigin baǵyndyrý ekendigi týraly aıtqanyn jazǵan edik.
Sondaı-aq Fatıma Supyǵalıeva Qazaqstan tarıhynda qyzdar arasynda tuńǵysh álem chempıony atandy.
