Daryndy jastarǵa árdaıym qoldaý kórsetiledi — Prezıdent
ASTANA. KAZINFORM — Memleket basshysy halyqaralyq pán olımpıadalary jeńimpazdarymen jáne júldegerlerimen kezdesý barysynda, memleket tarapynan barsha daryndy jastarǵa árdaıym qoldaý kórsetiletinin, jastardyń sapaly bilim alyp, jan-jaqty damýy úshin barynsha jaǵdaı jasalatynyn jetkizdi. Bul týraly Aqorda málim etti.
— Álem tez ózgerip jatqany sonshalyq, taıaý keleshekte ne bolaryn eshkim tap basyp aıta almaıdy. Biraq bilimge qushtarlyq, óz kúshińe sený, tabandy eńbek kez kelgen ýaqytta tabysqa jeteleıtinin umytpaýymyz kerek. Keleshek týraly bir nárseni senimmen aıtýǵa bolady — túbi adam kapıtalyn damytýǵa jáne jańa tehnologııalardy ekonomıka men qoǵamnyń barlyq salasyna engizýge basa mán bergen elder ozady. Qazaqstannyń qarqyndy damýyn qamtamasyz etý úshin bıyl «Tsıfrlandyrý jáne jasandy ıntellekt jyly» dep jarııalandy. Sizder, talantty jastar osy jasampaz úderisterdiń aldyńǵy shebinde júresizder. Qazaqstan jastary Sizderge qarap boı túzeıdi, úlgi alady. Bilim men ǵylym, ınnovatsııa men ozyq tehnologııa — búgingi dáýirdiń basty qarýy. Jahandyq básekede bilimdi, zııatker elder ǵana alǵa shyǵady. Sondyqtan men sizderdi «Qazirgi zamannyń naǵyz batyrlary» dep sanaımyn. Men qazaq jastarynyń otanshyl, bilimpaz, eńbekqor bolǵanyn qalaımyn. Olar elge janashyr, tabıǵatqa qamqor, naǵyz adal azamat bolýyn tileımin. Atap aıtqanda, eriktilerdiń eńbegin joǵary baǵalaımyn, qoldaımyn. Men jastarǵa senemin! — dedi Memleket basshysy.
Qasym-Jomart Toqaev óskeleń urpaqtyń talantyn shyńdap, bilim bergen ustazdar qaýymyna alǵys aıtty.
— Qazir bizdiń ortamyzda sanaly urpaq tárbıelep, olardy úzdikter qataryna qosqan ulaǵatty ustazdar otyr. Sizderdiń eren eńbekterińiz zor qurmetke laıyq. Qabiletti balalardy oqytyp, olardy halyqaralyq jarystarǵa daıarlaıtyn pedagogterge shynaıy rızashylyǵymdy bildiremin. Bul — eń izgi is. Sizderdiń eńbekterińizdi memleket mindetti túrde eskeredi. Úkimet pen óńir basshylaryna osyndaı tapsyrma beriledi, — dedi Prezıdent.
Aıta keteıik, buǵan deıin Prezıdent Qazaqstan – naǵyz daryndy jastardyń eli. Ul-qyzdarymyz barlyq baǵytta, ásirese, bilim salasynda úzdikter qatarynan kórinip keletinin aıtty.
