Barselonadaǵy narazylyq sońy qaqtyǵys pen tonaýǵa ulasty

Negizgi sherý aıaqtalǵan soń, betperde kıgen adamdar qoqys jáshikterin órtep, dúkenderdiń vıtrınalaryn syndyrǵan, dep habarlaıdy Kazinform BBC-ge silteme jasap.

Narazylyq sherýiniń negizgi baǵyty Barselonanyń basty dańǵyly Paseo-de-Grasııa arqyly ótti. Kúndiz túrli baǵyttan kelgen sherýshiler osy jerde toǵysty.

El País basylymynyń jazýynsha, sherý merekelik sıpatta ótken. Barselona polıtsııasy oǵan 55 myń adam qatysty dep málimdese, kásipodaqtar bul kórsetkishti 400 myńǵa jýyq dep otyr.

Atalǵan oqıǵaǵa Ispanııadaǵy uzaqqa sozylǵan turǵyn úı daǵdarysy túrtki boldy. Ony eldiń eń iri eki kásipodaǵy – UGT men CCOO, sondaı-aq jaldaý aqysynyń qymbattaýy men turǵyndardy baspanasynan kúshtep shyǵarý jaǵdaıyna narazylyq bildirgen basqa da kásipodaqtar men jalǵa alýshylar birlestikteri qoldady.

Ortalyq banktiń málimetinshe, Ispanııada shamamen 750 myń úı jetispeıdi. Boljam boıynsha, 2028 jylǵa qaraı elde baspana tapshylyǵy 1 mıllıonnan asady.

Ereýil resmı túrde aıaqtalǵannan keıin bir top adam Paseo-de-Grasııa boıyndaǵy dúkenderdiń vıtrınalaryn qıratyp, keıbirin tonap, birneshe saýda ornyn órtegen.

Eń kóp zardap shekkenderdiń biri – qasbeti búlingen Lego oıynshyqtar dúkeni. Sondaı-aq narazylyq bildirýshilerdiń Apple dúkenine basyp kirýge árekettengeni baıqalǵan. Bul týraly BBC tilshileri habarlady.

Kóshelerde ondaǵan qoqys jáshigi órtenip, polıtsııamen qaqtyǵys bolǵan. BBC tilshisine suhbat bergen narazylyqqa qatysýshylardyń biri baspana baǵasynyń qymbattaýyna qarsylyq bildirýge kelgenin aıtqan jáne sherýge balalar men qarttar da kóp qatysqan.

-Keshke ol Rambla býlvary mańynda bolyp, kóshelerdegi órtti kórgen. — Aınala otqa oranyp, jaǵdaı qatty shıelenisti, — dedi ol.

Barselona meri Jaýme Kolbonıdiń málimetinshe, tártipsizdikterge baılanysty Katalonııa polıtsııasy 50 adamdy ustaǵan. Sondaı-aq ol qala ákimdigi keltirilgen shyǵynǵa qatysty sot protsesine qatysatynyn málimdedi.

Jalpyulttyq ereýilge Madrıdte 87 jastaǵy áıeldiń úıinen shyǵarylyp, keıin qaıtys bolýyna baılanysty narazylyq aktsııalary túrtki boldy.

Qazanda Ispanııa parlamenti jaldaý aqysyn tólemegeni úshin turǵyndardy úıden shyǵarýdy tejeý jáne baspana jaldaý qunynyń sharyqtaýyna jol bermeý jónindegi úkimet qaýlysyn qabyldamady. Narazylyqtar da Premer-mınıstr Pedro Sanchesti kezekten tys saılaýdy 29 qarashaǵa belgileýge májbúr etti.

Pedro Sanches bastaǵan sotsıalıster narazylyq aktsııalaryn qoldap, turǵyn úı daǵdarysyna ońshyl oppozıtsııany kinálady.

Eske sala keteıik, buǵan deıin Ispanııada bir táýlikke jalǵasatyn jalpyhalyqtyq ereýil ótetini habarlanǵan bolatyn.