Barselonada HІH ǵasyrdaǵy shokolad fabrıkasy tabyldy

ASTANA. KAZINFORM - Barselonanyń Eski qala (Ciutat Vella) aımaǵynda qazba jumystaryn júrgizgen arheologtar HІH ǵasyrdaǵy shokolad fabrıkasynyń izderin tapty. Bul týraly BELTA jazdy. 

Bul jańalyq Plasa-de-la-Lıana aýmaǵyndaǵy tórt qabatty ǵımaratty jóndeý kezinde anyqtalǵan. 

HeritageDaily-dyń habarlaýynsha, olardyń arasynda HІV ǵasyrdaǵy ortaǵasyrlyq saraıdyń qaldyqtary, HVIІ ǵasyrdaǵy qorshaýlar jáne HІH ǵasyrdaǵy shokolad fabrıkasynyń izderi bolǵan.

Tarıhı mátinderde tabylǵan dálelderge sáıkes, saraı bastapqyda Pıa Almoına degen atpen belgili Barselona soborynyń sadaqhanasyna tıesili bolǵan. HV ǵasyrda ǵımarat HVІ ǵasyrǵa deıin bolǵan Hostal de Sant Pere dep atalatyn qonaqúıge aınaldy. 1825 jyly qalpyna keltirilgennen keıin ǵımaratta Clemente Guardia shokolad fabrıkasy ornalasty. 

Zaýyt 1888 jylǵy Barselonanyń ámbebap kórmesiniń almanahynda aıtylǵan. Sol kezde ol talǵampaz shokolad pen pastıldi (qant pastasynan jasalǵan glazýr túri) jáne vanıldi shokolad, sondaı-aq draje óndirýmen tanymal boldy. 

HІH ǵasyrda fabrıka Barselonadaǵy eń tanymal shokolad óndirýshilerdiń birine aınalǵan. Ol óz ónimderin búkil Ispanııaǵa jáne atalǵan el baqylaıtyn shetel aýmaqtaryna eksporttady. 

Barselona arheologııalyq qyzmetiniń (ICUB) sarapshylary zaýytta kóptegen arhıtektýralyq elementti, sondaı-aq japsyrmalardy jasaý úshin qoldanylatyn saqtaý ydystaryn jáne qorǵasyn tabaqtardy tapty.