Barselonada COVID-19 vırýsyn juqtyrýshylar sany artyp, ekinshi lokdaýn engizildi
BARSELONA. QazAqparat – Senbi kúni Barselona men onyń mańynda COVID-19 juqtyrǵandar sanynyń ósýine baılanysty ekinshi 15-kúndik lokdaýn engizildi, dep habarlaıdy QazAqparat EFE-ge silteme jasap.
Jergilikti bılik shekteýlerdi sońǵy aptada COVID-19 vırýsyna shaldyǵý oqıǵalarynyń sany aıtarlyqtaı ósip ketkennen keıin engizý týraly sheshim qabyldaǵan. Óńirlik úkimet jańa shekteý sharalary týraly juma kúni habarlap, turǵyndardan úılerinen asa qajet bolmasa shyqpaýyn surady. 10 adamǵa deıin jınalatyn qoǵamdyq sharalardy ótkizýge ruqsat berý týraly sheshim qabyldandy. Meıramhanalar men barlar adamdarǵa 50 paıyzǵa deıin tolyp jumys isteıtin bolady. Al túngi klýbtar, kınoteatrlar, teatrlar men sport zaldarynyń jumysy toqtady.
Barselona men onyń astanalyq aımaǵy – Katalonııadaǵy halyq tyǵyz ornalasqan aýdan, koronavırýs ınfektsııasyna shaldyǵýdyń 70-ke jýyq paıyzy dál sol jerde anyqtalǵan.
Juma kúni aımaqtyq densaýlyq saqtaý organdary óńirde sońǵy 24 saǵatta jańa 1293 oqıǵa týraly habarlaǵan, sonyń ishinde indetke shaldyqqan 884 adam – Barselonanyń astanalyq aýdanynan.
Resmı málimet boıynsha, Katalonııada pandemııa bastalǵannan beri COVID-19 juqtyrýdyń 80 700-den astam oqıǵasy tirkelgen.
Shekteýler Lerıda qalasyna da tıesili. Osy aptanyń basynda Katalonııada úlkendigi jaǵynan ekinshi orynda turǵan Ospıtalet-de-Lobregat qalasynda arnaıy sharalar qabyldanǵan.
Ispanııanyń Katalonııamen kórshiles Aragon aımaǵynyń soltústik-shyǵys bóliginiń keıbir aýdandarynda da COVID-19 vırýsynyń taralýyn ustap turýǵa baǵyttalǵan jańa shekteýler engizildi. Aragon bıliginiń teri fermasynda koronavırýs anyqtalǵan 92 myńǵa jýyq qarakúzendi óltirý (jansyzdandyrý) sheshimin qabyldady. Sonyń saldarynan fermanyń birqatar jumyskeri koronavırýs juqtyryp alǵan. Saragosa men Ýeska qalalary beısenbi kúni tirkelgen 272 jańa oqıǵadan keıin shekteýlerdi qalpyna keltirdi.
Eske sala keteıik, Ispanııa – Eýropada COVID-19 vırýsynan eń kóp zardap shekken elderdiń biri. Onda aýrý juqtyrýdyń 250 myńnan astam oqıǵasy men 28 myńǵa jýyq ólim oqıǵasy tirkeldi.
