«Barselona» men «Bavarııa» Chempıondar lıgasynyń jartylaı fınalyna shyqty
ASTANA. QazAqparat - Ispanııalyq "Barselona" men Mıýnhenniń "Bavarııasy" Chempıondar lıgasynyń jartylaı fınalyna shyqty, dep jazady Vesti.kz.
"Barselona" týrnırdiń shırek fınalynyń qarymta kezdesýinde óz alańynda Frantsııanyń "Parı Sen-Jermen" komandasyn 2:0 esebimen jeńdi. Eki goldy da oıynyń 14-inshi jáne 34-inshi mınýtynda Neımar soqty. Alǵashqy kezdesýdi de «katalondyqtar» 3:1 esebimen óz paıdasyna sheshken bolatyn.
Osy oıynmen qatar "Bavarııa" qarymta kezdesýde 6:1 esebimen "Portýdyń" tas-talqanyn shyǵardy. Olar birinshi taımnyń ózinde qarsylas qaqpasyna jaýapsyz 5 gol salyp, jartylaı fınalǵa joldama alyp qoıǵan edi. Al shırek fınaldyń birinshi oıynynda «Portý» 3:1 esebimen jeńgenin aıta keteıik.
Jartylaı fınaldyń jerebe tartý rásimi 24 sáýir kúni Shveıtsarııanyń Non qalasynda ótedi.
