«Barselona» kóz tikken Kárim Meńdiqanov Qazaqstan jastar quramasyna shaqyrtý aldy
ASTANA. KAZINFORM – Qazaqstan fýtbol federatsııasy Damý kýbogy oıyndaryna shaqyrylǵan 16 jasqa deıingi ulttyq qurama fýtbolshylarynyń tizimin jarııalady, dep habarlaıdy Kazinform.
Sáýirdiń 25-i men 30-y aralyǵynda Shymkent qalasynda Qazaqstan, Ázerbaıjan, Pákistan jáne Reseı jastar quramasynyń (16 jasqa deıingi oıynshylar) qatysýymen Damý kýbogy ótedi.
Qazaqstan jastar quramasynyń quramynda negizinen federatsııa akademııasynda sheteldik jáne jergilikti bapkerlerdiń jetekshiligimen daıyndalǵan oıynshylar bar. Sonymen qatar quramǵa Eýropa akademııalarynda jattyǵatyn talantty jas oıynshylar da qosylǵan. Olardyń arasynan Abdýlla Bapıshev (Magdebýrg, Germanııa) pen Kárim Meńdiqanovty (Sant Kýat, Ispanııa) erekshe atap ótken jón.
Aıta ketý kerek, Meńdiqanov qazirgi ýaqytta resmı túrde «Sant Kýat» fýtbol klýbynyń oıynshysy sanalady. Alaıda, 2026 jyldyń kúzinen bastap ol «Barselona» akademııasynyń oıynshysy retinde tirkeledi.
Meńdiqanov pen «Barselona» arasyndaǵy kelisimshart 2026 jyldyń 1 sáýirinde resmı túrde jarııalandy. Kazinform tilshisine bergen eksklıýzıvti suhbatynda fýtbolshynyń ákesi bul oqıǵanyń Qazaqstan fýtboly úshin tarıhı mańyzǵa ıe ekenin atap ótti. Sebebi «Barselona» akademııasynda buǵan deıin qazaqstandyq oıynshy bolmaǵan.
