Barselona áýejaıynda ata-anasy 10 jasar ulyn tastap, demalysqa ketip qalmaq bolǵan

ASTANA. KAZINFORM — Ispanııanyń Barselona qalasyndaǵy El-Prat halyqaralyq áýejaıynda ata-anasynyń 10 jastaǵy balasyn jalǵyz qaldyryp ketkeni qoǵamda úlken narazylyq týdyrdy. Olar uldarynyń qujattarynyń jaramsyz ekenin bilgen soń, ony áýejaıda tastap, ózderi ushaqqa minip, josparlanǵan demalysyn jalǵastyrýdy jón kórgen, dep habarlaıdy Euronews.

Olar qujattary tolyq bolmaı shyqqan uldaryn áýejaı termınalynda qaldyryp, ony bir týysy kelip alyp ketedi dep úmittengen. Al ózderi reıske keshikpeý úshin balany jalǵyz tastap ketken.

Barselona áýejaıyndaǵy áýe kompanııasy úılestirýshisiniń TikTok-taǵy @limasin41 akkaýntynda jarııalanǵan málimetke súıensek, balanyń jaramdy ıspandyq pasporty bolǵan, alaıda ushýǵa qajetti vıza bolmaǵan. Osy sebepti ol ushaqqa otyra almaǵan.

Mundaı jaǵdaıda ata-ana týysyna habarlasyp, balaǵa qaraı turýyn suraǵan, al ózderi eshteńe bolmaǵandaı ushyp ketpek bolǵan.

Bul áreketke ashýlanǵan áýe kompanııasynyń úılestirýshisi áleýmettik jelide vıdeo jarııalap, kórgenine senbegenin aıtyp, bul jaǵdaıdy synǵa aldy.

— Men áýe kompanııasynyń úılestirýshisimin jáne ómirimde talaı nárse kórdim, biraq bul jaǵdaı múldem shyndyqqa janaspaıtyn, — dedi ol TikTok-ta jarııalanǵan jazbasynda.

Áýejaı ákimshiligi bul jaǵdaıdy nazardan tys qaldyrmady. Dabyl arqyly birneshe ret habarlaǵannan keıin eshkim jaýap bermegen soń, qaýipsizdik qyzmeti iske aralasty. Aqyry balasyn tastap ketpek bolǵan ata-ana ózderi oılaǵandaı ushyp kete almady. 

— Polıtsııa qyzmetkerleri ata-ana men olardyń ekinshi balasyn on jastaǵy ul bolǵan polıtsııa bólimshesine alyp ketti, — dep túsindirdi áýe kompanııasynyń úılestirýshisi.

Eń soraqysy bul jaǵdaıǵa ata-ananyń esh ókinbeýi. Áýejaı qyzmetkeriniń aıtýynsha, olar óz isterinen esh ábestik kórmeı, muny «qalypty jaǵdaı» dep sanaǵan.