Barselona áýejaıynda 100-den astam reıs keıinge qaldy

ASTANA. KAZINFORM – Ispanııanyń Katalonııa avtonomııalyq qaýymdastyǵynda qatty jel saldarynan keminde 101 áýe reısi toqtatyldy, dep habarlaıdy TASS.

Aena áýejaı operatorynyń dereginshe, Barselona halyqaralyq áýejaıynda 101 reıs keıinge shegerilgen. Budan bólek, taǵy 10 ushaq basqa áýejaılarǵa baǵyttalǵan. Kompanııanyń X jelisindegi málimetinde meteorologtar aýa raıynyń birtindep jaqsaratynyn boljap otyrǵany aıtylǵan.

Katalonııanyń Azamattyq qorǵaý bas basqarmasy óńirde qolaısyz aýa raıyna baılanysty júzdegen oqıǵa tirkelgenin málimdedi.

«86 adamǵa medıtsınalyq kómek qajet boldy, olardyń 34-i medıtsınalyq mekemelerge jetkizildi», – delingen habarlamada.

Ispanııanyń Memlekettik meteorologııalyq agenttigi 12 aqpanda Katalonııada aýa raıynyń kúrt nasharlaıtyny jóninde eskertý jasaǵan. Birqatar eldi mekende qaýip deńgeıi qyzǵylt sary – joǵary qaýipti deńgeıge kóterilgen. Jel ekpini saǵatyna 100 shaqyrymǵa deıin jetýi múmkin.

Qolaısyz jaǵdaıǵa baılanysty óńir úkimeti mektepter men ýnıversıtetterdegi sabaqtardy toqtatyp, shuǵyl emes medıtsınalyq qyzmet kórsetýdi ýaqytsha shektedi.

Aıta keteıik, bir apta buryn «Leonardo» daýylyna baılanysty Ispanııada 3 myńǵa jýyq adam evakýatsııalandy.