Barlyq jeńisterimiz ben medaldarymyzdy el táýelsizdiginiń 20 jyldyǵyna arnadyq - sporttyq baǵdarlaýdan memlekettik jattyqtyrýshy I.Şeglova
ASTANA. 10 aqpan. QazAqparat /Gúlmıra Álıakparova/ - Barlyq jeńisterimiz ben medaldarymyzdy Qazaqstan Táýelsizdiginiń 20 jyldyq mereıtoıyna arnadyq.
16-jazǵy jáne 7-qysqy Azııa oıyndary jeńimpazdarynyń Astana ákimi Imanǵalı Tasmaǵambetovpen bolǵan kezdesýinde sporttyq baǵdarlaýdan memlekettik jattyqtyrýshy Irına Şeglova osylaı aıtty.
I.Şeglovanyń shákirtteri Mıhaıl Sorokın men Olga Novıkova 2011 jyly Astana men Almaty qalalarynda ótken 7-qysqy Azııa oıyndarynyń tórt dúrkin jeńimpazy boldy.
«Sporttyq baǵdarlaý boıynsha jarystar Qysqy Azııa oıyndarynyń baǵdarlamasyna alǵash engizildi. Sondyqtan jaýapkershilik óte joǵary boldy. Al Aq Azıadanyń alǵashqy eki altyn medalin bizdiń ıelengenimiz biz úshin - úlken qurmet», - dedi ol.
«Sporttyq baǵdarlaýdan bizdiń jeńisterimizden keıin, quramamyzǵa medaldar qarsha jaýa bastady. Al qalǵan sportshylar odan saıyn jigerlenip, kóshbasshylyq qarqyndy túsirgen joq. Barlyq jeńisterimiz ben barlyq medaldarymyzdy Qazaqstan Táýelsizdiginiń 20 jyldyǵyna arnadyq», - dedi I.Şeglova.
Bapker sondaı-aq, sportshylarǵa árdaıym qoldaý bildirip otyrǵan elorda basshylyǵy men sportshylarǵa jankúıerlik etken barsha qazaqstandyqtarǵa sheksiz alǵysyn bildirdi.
