Barlyq vaktsına zertteýdiń qajetti kezeńderinen ótýi kerek – Qaısar Tabynov
NUR-SULTAN. QazAqparat - Qazaq Ulttyq agrarlyq ýnıversıteti janyndaǵy Halyqaralyq Vaktsınologııa ortalyǵynyń dırektory Qaısar Tabynov koronavırýsqa qarsy qaı vaktsınalar naryqqa shyǵýy kerektigin túsindirdi, dep habarlaıdy QazAqparat tilshisi.
«Álemdegi jaǵdaıǵa jalpy toqtalsaq, qazirgi kezde 31 kandıdat vaktsına klınıkalyq zertteý kezeńinde tur. Onyń ishinde altaýy klınıkalyq zertteýdiń sońǵy kezeńine deıingi úshinshi satysyna jetti, ıaǵnı olar basqalaryna qaraǵanda ozyq kele jatyr. Osy tusta qysqa jáne uzaq merzimge negizdelgen jaǵdaıdy eskerý kerek. Qazir úshinshi kezeńdegi alda turǵan barlyq kompanııalar vaktsınalary osyǵan deıin keńinen paıdalanylmady. Bul turǵyda qaýipsizdikke, tıimdilikke qatysty suraqtar kóptep qoıylyp jatqany belgili. Sarapshy retinde aıtarym, naryqqa óziniń tıimdiligin kórsetken vaktsınalar shyǵady», - dedi ol koronavırýstyń ekinshi tolqynyń júrý múmkindigin talqylaýǵa arnalǵan onlaın jıynda.
Sonymen qatar Qaısar Tabynov qazirgi kezde reseılik vaktsınanyń klınıkalyq zertteýleri jalǵasyp jatqanyn atap ótti.
«Vaktsınolog retinde ne úshin alańdap otyrmyn? Vaktsınany tirkeý týraly asyǵys jasalǵan sheshimderdiń saldarynan jalpy vaktsınalaýǵa qatysty halyqtyń senimi tómendeıdi. Ózderińiz bilesizder, vaktsınalaýǵa qarsy pikir aıtýshylar bar. Qysqa merzimde tıisti deńgeıde tekserilmegen vaktsınalardy aınalymǵa shyǵarǵanda jaǵymsyz jaǵdaılar oryn alsa, onda bul ahýal vaktsınalaýdyń tutas salasyn kúmándi etedi. Sondyqtan biz vaktsınany shyǵaratyn bolsaq, ony tekserilgen tehnologııalarda júzege asyrǵan jón. Ekinshiden, osy vaktsınalar barlyq tıisti zertteý kezeńderinen ótýi tıis», - dedi Halyqaralyq Vaktsınologııa ortalyǵynyń dırektory.
