Barlyq turǵyndardy vaktsına saldyrýǵa shaqyramyn - Aqtoty Álnazarova

QYZYLORDA. QazAqparat - Qyzylorda oblysynda koronavırýs indetine qarsy vaktsına saldyrǵan turǵyndar sany artyp keledi, dep habarlaıdy QazAqparat tilshisi.

Qazir oblys boıynsha koronavırýs juqtyrǵandar sany 4223 adamǵa jetti. Onyń 3 paıyzy syrttan tasymaldanǵan bolsa, 56 paıyzy skrınıngtik tekserý nátıjesinde anyqtalǵan.

Al 41 paıyzy qarym-qatynas arqyly juqtyrǵan.

Ótken táýlikte 25 adamnyń qaterli indettiń quryǵyna ilikti.

Qyzylorda oblysynda aqpan aıynan beri 7 myńnan astam adam koronavırýsqa qarsy ekpe saldyrǵan.

Solardyń qatarynda oblystyq psıhıkalyq densaýlyq ortalyǵy dırektorynyń orynbasary Aqtoty Álnazarova da bar.

«Búginde kún ótken saıyn koronavırýs indetiniń tyrnaǵyna ilikken naýqastardyń sany artýda. Qaterli dert adam densaýlyǵy men ómirine úlken qaýip tóndirip tur. Osyǵan oraı men barlyǵyńyzdy saqtyq sharalaryn qatań ustanýǵa shaqyramyn. Ózim koronavırýs indetine qarsy «Spýtnık-V» vaktsınasyn saldyrdym. Sizderdi de ekpe saldyrýǵa shaqyramyn. Mamandar keńesine qulaq asaıyq! Betperde taǵyp júrýdi umytpaıyq. Toı-tomalaqtan bas tartaıyq», - dedi Aqtoty Álnazarova.

Óńirde vaktsınatsııa №1, 3, 4, 5, 6 qalalyq emhanada, barlyq aýdanda jáne Baıqońyr qalasynda júrgizilýde.

Bul maqsatta alǵashqy medıtsınalyq-sanıtarlyq kómek mekemelerinde 14 egý kabıneti daıyndalǵan.

Barlyq ekpe talapqa saı, temperatýralyq rejımdi qadaǵalaıtyn arnaıy mashınamen halyq sanyna baılanysty ekpe egý oryndaryna jetkizilýde.