Barlyq salada shıkizat pen materıal baǵasynyń ósý qarqyny baıaýlady
ALMATY. QazAqparat- Ulttyq banktiń aqsha-kredıt saıasaty departamentiniń dırektory Jandos Shaımardanov 2020 jyldyń IV toqsanynda ekonomıkanyń naqty sektoryndaǵy kásiporyndarǵa júrgizilgen saýalnama nátıjesi týraly aıtty, dep habarlaıdy QazAqparat tilshisi.
Onyń aıtýynsha, kásiporyndar arasynda Ulttyq bank júrgizgen saýalnama nátıjeleri boıynsha 2020 jyldyń IV toqsanynda barlyq salada básekelestiktiń mańyzdylyǵy joǵary deńgeıge ıe bolǵan.
Saýda kásiporyndary naryqtyq básekeniń yqpalyna kóp ushyraıdy, munda respondentterdiń 42,5%-y básekelestiktiń óz bıznesine áser etkenin aıtady. Óńdeý ónerkásibinde mundaı kásiporyndardyń úlesi 31,0%-ǵa jetedi, al taý-ken ónerkásibinde 12,2% ǵana.
IV toqsanda daıyn ónimge qatysty suranys jaǵdaıy birshama jaqsardy. Aýyl sharýashylyǵynda dıffýzııa ındeksi – 57,5 suranys ta ósip keledi, óńdeý ónerkásibi oń aımaqqa kirdi (DI – 51,7), kólik, qurylys jáne taý-ken ónerkásibinde quldyraý báseńdedi. Saýda salasynda suranystyń tómendeýi turaqtaldy. Sonymen birge barlyq salada shıkizat pen materıal baǵasynyń ósý qarqyny baıaýlady.
«2021 jyldyń І toqsanynda suranys jaǵdaıy odan ári jaqsarady dep kútiledi, DI-diń eń úlken ósimi óńdeý ónerkásibinde (DI – 58,1), qurylysta (DI – 59,6) jáne saýdada (DI – 56,1) bolady dep boljanýda.Kásiporyndar daıyn ónimge suranystyń ósýin, shıkizat pen materıaldar baǵasynyń ósýiniń jedeldeýin, sondaı-aq jalaqy jaǵdaıynyń jaqsarýyn kútedi. Sonymen birge óndiris kóleminiń maýsymdyq tómendeýi bolýy múmkin»,- deıdi Jandos Shaımardanov.
Saýalnamaǵa barlyǵy 2,6 myńnan astam taý-ken jáne óńdeý ónerkásibi, qurylys, saýda, aýyl sharýashylyǵy, kólik jáne qoıma kásiporyndary qatysty.
