Barlyq óńirge Sinopharm vaktsınasynyń 1-toptamasy jetkizildi

NUR-SULTAN. QazAqparat – Barlyq óńirge Qytaıdyń Sinopharm vaktsınasynyń 1-toptamasy jetkizildi. Bul týraly Úkimet otyrysynda QR Densaýlyq saqtaý mınıstri Alekseı Tsoı málim etti, dep habarlaıdy QazAqparat tilshisi.

«Búginde 1-komponentin halyqtyń vaktsınatsııalaýǵa jatatyn tobynyń 62 paıyzy, 6,1 mln adam vaktsına aldy. Al 2-komponent 4,8 mln adamǵa salyndy. Bul halyqtyń vaktsınatsııalanatyn tobynyń 48 paıyzyn quraıdy», - dedi ol.

Mınıstrdiń dereginshe, koronavırýsqa qarsy vaktsınalaý jumysy Shymkent qalasynda, Túrkistan, Almaty, Soltústik Qazaqstan, Shyǵys Qazaqstan, Qyzylorda oblystarynda joǵary deńgeıde júrgizilip jatyr. Al vaktsınanyń 1-dozasyn alýshylar qatary Mańǵystaý oblysynda tómen. Bul óńirde halyqtyń 35 paıyzy ǵana vaktsına alǵan.

«Óńirler vaktsınanyń jetkilikti kólemimen qamtamasyz etilgen. Vaktsına jetkizý kestege sáıkes júrgizilip jatyr. Barlyq óńirge Qytaıdyń Sinopharm vaktsınasynyń 1-toptamasy jetkizildi. Jetkizý jumystary jalǵasyp jatyr», - dedi Alekseı Tsoı.