Barlyq óńirde kóktemgi egis naýqany aıaqtaldy
NUR-SULTAN. QazAqparat - Bıyl kóktemgi egis naýqany fermerler úshin qolaıly jaǵdaıda ótti. Bul týraly Úkimet úıinde ótken baspasóz máslıhatynda QR Aýyl sharýashylyǵy birinshi vıtse-mınıstri Aıdarbek Saparov málim etti, dep habarlaıdy QazAqparat tilshisi.
«Qazirgi kezde barlyq óńirde kóktemgi egis naýqany aıaqtaldy. Josparlanǵan agro-tehnıkalyq is-sharalardy ótkizýge eshqandaı kedergi bolǵan joq. Fermerler tuqymmen, janar-jaǵarmaımen, qarjy resýrstarymen tıisti kólemde qamtamasyz etildi», - dedi ol.
A. Saparovtyń aıtýynsha, jalpy egis alqaby 19 mln gektardy qurap, onyń ishinde dándi daqyldar - 14,5 mln gektar, maıly daqyldar - 2,7 mln gektar, kókónis jáne baqsha daqyldary, kartop - 458 myń gektar, mal azyǵy daqyldary 1,2 mln gektar alqapty qamtydy.
«Bıyl egis naýqanyna 147 myń traktor men 4 myń ónimdiligi joǵary egin sebetin keshender qatysty. Tehnıkalyq parkti kóbeıtýge memlekettiń qoldaý sharalary boıynsha eleýli jumystar atqaryldy. Naýryz-maýsym aıy kezeńinde egis jumystaryna jalpy 380 myń tonna dızel otyny bólindi. Bir lıtrdiń ortasha baǵasy 176 teńgeni qurady, naryqtyq baǵamen salystyrsaq, 10 paıyzǵa tómen. Kúzde de jospar boıynsha janar-jaǵarmaı osylaı beriletin bolady», - dedi mınıstrlik ókili.
Onyń sózine qaraǵanda, kóktemgi egis jumystaryna bıyl 60 mlrd teńge somasynda bıýdjettik nesıe bólindi.
