Barlyq óńirde balalar men jastar bir mezgilde sherýge shyǵady
NUR-SULTAN. QazAqparat - Erteń, 1 maýsym kúni elimizdiń barlyq óńirinde bir mezgilde balalar men jastardyń mýzykalyq orkestrleri men ansamblderiniń sherýi ótedi, dep habarlaıdy QazAqparat tilshisi.
QR Bilim jáne ǵylym mınıstrliginiń baspasóz qyzmetinen málim etkendeı, búginde sherýge daıyndyq qyzý júrip jatyr.
«Bıyl sherý tek oblys ortalyqtary men Nur-Sultan, Almaty, Shymkent qalalarynda ótedi. Elimizdiń barlyq óńirinde jumys toptary qurylyp, merekelik shara daıyndyǵyn úılestirýshi jaýapty mamandar anyqtaldy. Sherý baǵyttary ázirlenip, rejısserler belgilendi. Ońtústik óńirlerde, ıaǵnı Qyzylorda, Shymkent, Túrkistan, Taldyqorǵan, Taraz, Aqtaý, Atyraý qalalarynda joǵary aýa temperatýrasyna baılanysty sherý tańǵy saǵat 9.00-de, qalǵan qalalarda saǵat 10.00-de bastalady. Jergilikti atqarýshy organdardyń aqparatyna sáıkes, 2,5 myń bilim oshaǵynan bir ýaqytta 98 309 adam sherýge shyǵady. Olardyń ishinde jas mýzykanttardan bólek, pedagogter men ata-analar da bar», - delingen mınıstrlik habarlamasynda.
Atap aıtqanda, paradqa Qyzylorda qalasynan - 8,5 myń, Aqtóbeden - 7 929, Nur-Sultannan - 7 myń 830, Qaraǵandydan - 7,5 myń, Aqtaý jáne Pavlodar qalalarynan 7 myńnan adam qatyspaq.
Sherýdiń kórkin 136 barabanshylar otrıady, 91 úrmeli orkestr, 534 qazaq jáne orys halyq aspaptary ansambli, 780 cherlıderler men majoretkalar komandasy, hor jáne bı ujymdary, 266 kadetter men sportshylardan, pedagogtardan quralǵan ujymdar kirgizedi.
Qatysýshylardyń qaýipsizdigine, medıtsınalyq kómekpen qamtylýyna, sýdan tarshylyq kórmeýine jergilikti ákimdikter jaýapty.
