Barlyq memlekettik telearnalardaǵy qazaq tilindegi baǵdarlamalar úlesi 70 paıyzǵa jetti - QR Mádenıet mınıstri
ASTANA. Jeltoqsannyń 21-i. QazAqparat /Qanat Mámetqazyuly/ - Barlyq memlekettik telearnalardaǵy memlekettik tildegi baǵdarlamalar úlesi 70 paıyzǵa jetti. Búgin QR Parlamenti Májilisinde ótken Úkimet saǵatynda QR Mádenıet jáne aqparat mınıstri Muhtar Qul-Muhammed osylaı málim etti,
dep habarlaıdy QazAqparat.
«Bıylǵy jyly buqaralyq aqparat quraldary týraly zańǵa birqatar ózgerister engizilgeni málim, qujat kúshine enetin keler jyldan bastap zań talaptary kúsheıtile túsetin bolady. Búgingi kúnniń ózinde barlyq memlekettik telearnadaǵy qazaq tildi baǵdarlamanyń úles mólsheri 70 paıyzǵa jetti. Al retranslıatsııa máselesi túbegeıli sheshilgen. Jalpy, osy jumysty eń alǵash qolǵa ala bastaǵan kezeńde, keıbir otandyq kommertsııalyq telearnalarda qazaq tiliniń úles salmaǵy 3-5 paıyz ǵana bolatyn. Keıbir telearnalar óz kórsetilimderiniń 95 paıyzyn retranslıatsııalaıtyn. Qazir bul eki másele de sheshimin tapty. Memlekettik tildegi baǵdarlamalarǵa baılanysty, olardyń táýliktiń belgili bir mólsherinde ornalasýy jóninde áli problemalar bolǵanymen, jańa zańǵa sáıkes kelesi jyldan bastap bunyń barlyǵy tolyq retteledi», dedi M. Qul-Muhammed.
Sonymen birge, mınıstr aǵymdaǵy daǵdarys jaǵdaıyna qaramastan birqatar buqaralyq aqparat quraldarynyń tapsyrys alǵandyǵyn da atap ótti. Mınıstrlikte aqparat salasy boıynsha 500-den astam respýblıkalyq, 700 óńirlik is-sharalardy jaryqqa shyǵarýǵa qatysty arnaıy medıa-jospar jasalyp, bulardyń barlyǵy tolyq júzege asqan.
