Barlyq mektepterde mindetti kıim úlgisin engizýdi zańnamalyq túrde bekitý qajet - T. Ómirzaqov
ASTANA. 21 qarasha. QazAqparat - Barlyq mektepterde mindetti kıim úlgisin engizýdi zańnamalyq túrde bekitý qajet. Búgingi Májilistiń jalpy otyrysynda Bilim jáne ǵylym mınıstrine depýtattyq saýal joldaǵan Tursynbek Ómirzaqov osylaı málim etti.
Depýtattyń aıtýynsha, Memleket basshysy óziniń baǵdarlamalyq maqalasynda balalardyń, jasóspirimder men jastardy rýhanı-parasattylyq tárbıesiniń tásilderi jetkiliksizdigine nazar aýdarǵan bolatyn. Al T. Ómirzaqovtyń paıymynsha, tárbıe, tártipti kóterý, oqýǵa yntalandyrý, balalardyń teń quqyǵyn saqtaý quraldarynyń biri kıim úlgisine talaby bolyp tabylady.
«Mektep formasy Ulybrıtanııa, Avstralııa, AQSh, Kanada elderinde keńinen taralǵan. Sıngapýr, Japonııa jáne Túrkııada mektep formasy mindetti bolyp sanalady. Keńestik mektep formasy keńes balalarynyń teńdigin jáne biryńǵaılyǵyn qamtamasyz etetin. Qazaqstan Respýblıkasynyń «Bilim týraly» Zańyna sáıkes bilim alýshylar bilim berý uıymdarynda belgilengen kıim úlgisin saqtaýǵa mindetti. Alaıda bul norma, tájirıbe júzinde oqý oryndarynyń kóbinde iske asyrylmaı keledi», - deıdi depýtat. Osyǵan oraı, T. Ómirzaqov barlyq mektepterde mindetti kıim úlgisin engizýdi zańnamalyq túrde bekitý qajettigin alǵa tartady.
«Birinshiden, mektep formasyn engizý bilim alýshylardyń teńdigin, olardyń áleýmettik jáne materıaldyq jaǵdaıyna qaramastan, qamtamasyz etýine múmkindik týǵyzady. Bul balalardyń psıhologııalyq buzylystary táýekelin tıisinshe tómendetedi. Halyqtyń áleýmettik qorǵalmaǵan jikterine memleket esebinde mektep formasyn berýge bolady, bul olarǵa qosymsha qoldaý kórsetý bolyp tabylar edi. Ekinshiden, mektep formasyna degen biryńǵaı talaptar oqýshylar densaýlyǵynyń saqtap qalýy men nyǵaıýyn qamtamasyz etedi. Eger de biz tamaqtanýǵa, oqýshylar qaýipsizidigi úshin mektepterdiń materıaldyq-tehnıkalyq qamtamasyz etilýine biryńǵaı talaptaryn qoldanatyn bolsaq, soǵurlym kıimge de qatań talaptar qoıylýy tıis. Úshinshiden, otandyq jeńil ónerkásibi úshin jańa naryq taýashasy paıda bolady. Mektep formasyna memlekettik suranys jeńil ónerkásibine kúsh qosar edi. Bul rette mektep formasy baǵasyna memlekettik retteýdi qamtamasyz etý mańyzdy. Mektep formasy qoljetimdi, ári sapaly bolýy tıis». - dedi ol. Eske sala ketsek, qazirgi tańda elimizdegi oqýshylardyń jalpy sany 2,5 mln. balany quraıdy.
