Barlyq mektep-kolledjderde bir mezgilde qazaq kúıleri oryndalady

ASTANA. QazAqparat - 17 naýryz kúni barlyq bilim uıymynda elorda ýaqytymen saǵat 12:00-de «Naýryz meıramy» ulttyq chellendji ótedi. Bul týraly Oqý-aǵartý mınıstrliginiń tárbıe jumysy jáne qosymsha bilim berý departamenti dırektory Aman Seıtov aıtty, dep habarlaıdy QazAqparat.

Departament basshysynyń aıtýynsha, shara bilim alýshylardy ulttyq rýh pen otansúıgishtikke tárbıeleýge, eldiń mádenı murasyn saqtap, balalar arasynda ulttyq mýzykalyq aspapty nasıhattaýǵa baǵyttalǵan.

«Dombyrashylar chellendji-balalar men jastardyń, muǵalimder men ata-analardyń mýzykalyq óner salasyndaǵy shyǵarmashylyq jetistikterin kórsetý jáne dombyrany dáripteý. Oǵan barlyq nıet bildirýshiler qatysa alady. Mundaı chellendj oqýshylar arasynda alǵash ret ótkizilip otyr. Osy juma kúni elimizdiń barlyq bilim berý uıymdarynda bir ýaqytta dombyranyń qońyr úni kúmbirleıtin bolady. Bul respýblıkanyń mádenı ómirindegi erekshe oqıǵa»,— deıdi Aman Seıtov.

Aıta keteıik, bıyl elimizdiń barlyq jalpy bilim beretin mektepterinde Naýryz meıramy 10-17 naýryz aralyǵynda ótedi.

Bul kúnderi jalpy respýblıkalyq «Taza tabıǵat» aktsııasy, «Jasyl úı» chellendji, «Qaıyrymdy ult», «Qolónershiler jármeńkesi» qaıyrymdylyq aktsııalary, ulttyq oıyndar, ulttyq taǵamdar festıvali, «Naýryz – ulystyń uly kúni» atty sýret baıqaýy jáne «Otbasy – baqyt mekeni»otbasylyq jarys bastalady.

Sondaı-aq áleýmettik jelilerde #Naýryzmeıramy #Naýryzkúıi heshtegimen fleshmobtar men chellendjder josparlanǵan.