Barlyq qylmystyń úshten birin syrttan kelgender jasaıdy - Almaty prokýrory

ALMATY. QazAqparat - Almatyda ákimdikte ótken qoǵamdyq keńes músheleri men ІІD qyzmetkerleriniń otyrysynda Almaty prokýrory Berik Júıriktaev qaladaǵy qylmys týraly statıstıkalyq derekterdi keltirdi, dep habarlaıdy QazAqparat tilshisi. 

«Almaty - elimizdiń asa iri qarjy, bilim, mádenı ortalyǵy. Іshki jáne syrtqy kóshi-qon kórsetkishteri artyp keledi. Búginde quqyq buzýshylyqtyń 20 %-y Almatyǵa tıesili. Qylmystyq jaýapkershilikke tartylǵandardyń 31%-y - basqa óńirden kelgender nemese sheteldik azamattar(5 626 adamnyń 1 785-i)», - dedi prokýror. 

Sonymen qatar, prokýror adamnyń jeke tulǵasyna jasalǵan qylmysqa qarsy kúres áli de qanaǵattanarlyq deńgeıde emestigin aıtty. Mundaı qylmystar 4%-ǵa, tonaýshylyq 18%-ǵa artqan. Sonymen qatar, kámelettik jasqa tolmaǵandardyń arasyndaǵy qylmys 6%-ǵa artqan. Jyl basynan beri 2,5 myń jol oqıǵasy tirkelgen. Onda 3 myń adam japa shekse, 75 jaǵdaı qaıǵyly jaǵdaıda aıaqtaldy. 

«Almatyda kólik qozǵalysy óte ózekti. Biraq bul qolymyzdy silteı saldyq degen sóz emes. Barlyq qylmystardyń 70 paıyzy - bótenniń múlkin urlaý. Osy qylmystardan 2 mlrd teńgege jýyq shyǵyn keltirildi», - dedi B.Júıriktaev. 

Alaıda, páter tonaý men uıaly telefondardy jymqyrý sáıkesinshe 31% jáne 14%-ǵa qysqarǵan,
Al kólik urlaý deregi 9,5%-ǵa artty.

Almaty prokýrory qalalyq ІІD ókilderine jumysty jaqsartý baǵytynda birqatar nusqaýlyqtar berdi. 

«Urlyq qylmystaryn ashýǵa bar kúshti salý kerek. Urlanǵan zattardy satyp, aqsha jasaý joldaryn da kes-kestegen jón. Memleket basshysynyń quqyqbuzýshylyqqa - nól tózimdilik týraly tapsyrmasyn belsendi oryndaý kerek», - dedi B.Júıriktaev.