Barlyq kóterilgen máselelerdi sheshýdi aıaǵyna deıin jetkizý kerek - Premer

NUR-SULTAN. QazAqparat - Premer-Mınıstr Álıhan Smaıylov 27 mamyrdaǵy Aqmola oblysyna jumys saparynyń qorytyndysy boıynsha berilgen tapsyrmalardy oryndaý máseleleri jóninde keńes ótkizdi, dep habarlaıdy QazAqparat úkimettiń resmı saıtyna silteme jasap.

Keńeske qatysýshylar óńirdi selektsııanyń zamanaýı ádisterine kóshirý, mal soıýdy júzege asyratyn kásiporyndarǵa qoıylatyn sanıtarlyq talaptardy qataıtý jáne et óńdeıtin kásiporyndarǵa shıkizat jetkizýdi yntalandyrý boıynsha júrgizilip jatqan jumysty talqylady.

Odan bólek, óńirdiń aýyl sharýashylyǵyn sýbsıdııalaý baǵdarlamalaryn qarjylandyrý, aýyl sharýashylyǵy tehnıkasyn esepke alý boıynsha biryńǵaı tsıfrlyq platforma qurý, oblysty qajetti kólemde mazýtpen qamtamasyz etý jáne Kókshetaý qalasynda JEO salý máseleleri qaraldy.

Sonymen qatar Kókshetaýda káriz-tazartý ǵımarattaryn rekonstrýktsııalaý jáne sý tazartý qurylystaryn salý boıynsha jobalar, aýyldyq eldi mekenderdi sýmen jabdyqtaýdy damytý jobalaryn qarjylandyrý, normatıvtik jaı-kúıdegi joldardyń úlesin arttyrý jáne aýyl sharýashylyǵy tehnıkasy komponentteri óndirisin lokalızatsııalaý máseleleri talqylandy.

Sondaı-aq keńeske qatysýshylar AÓK úshin bilikti kadrlardy daıarlaýdyń qosymsha sharalaryn, oblystaǵy mektepter qurylysyn qarjylandyrý nusqalaryn, sonymen qatar saýda qyzmetin retteý jáne polımerlik qaptama óndiretin otandyq taýar óndirýshilerdi qoldaý tetikterin qarastyrdy.

Keńesti qorytyndylaı kele, Premer-Mınıstr Aqmola oblysy jáne basqa da óńirlerge jumys saparlary kezinde berilgen tapsyrmalardyń oryndalýyn erekshe baqylaýda ustaý qajettigin atap ótti.

«Tapsyrmalarda óńirler men turǵyndardyń naqty máseleleri kórsetilgen. Olardy sheshý kerek. Sondyqtan barlyq kóterilgen máselelerdi sheshýdi aıaǵyna deıin jetkizý kerektigine taǵy da nazar aýdarǵym keledi», - dedi Álıhan Smaıylov.

JAZYLÝ

Foto: primeminister.kz