Barlyq qoǵamdyq jerlerde defıbrıllıatorlar ornatylýy múmkin
QR Densaýlyq saqtaý vıtse-mınıstri Lıazat Aqtaevanyń aıtýynsha, osy salanyń mamandary naqty usynys jasasa, mınıstrlik defıbrıllıatorlardy qoǵamdyq jerlerde ornatý máselesin qarastyrýǵa daıyn. "Endi, bárimiz jaqsy bilemiz, buǵan deıin birqatar mektepterde oqýshylar sabaq kezinde qaıtys boldy. Ol mektepterde arnaıy medıtsınalyq pýnkter bar. Ol jerde isteıtin mamandar jedel járdem jasaýdy biledi. Tıisti daıyndyqtan da ótip turady. Biraq defıbrıllıator degen apparat bar. Ony qoldaný úshin arnaıy medıtsınalyq bilimniń qajeti joq. Bári avtomatty túrde jasalady. Osy salanyń mamandary mektepterde defıbrıllıator ornatý qajet dese, biz atalǵan máseleni sheshetin bolamyz. Árıne, ondaı apparattar qaýipsiz jerde turýy qajet. Negizi, defıbrıllıatorlar mektepterde ǵana emes, áýejaılarda, vokzaldarda, jattyǵý zaldarynda jáne taǵy basqa qoǵamdyq jerlerde ornatylýy tıis. Bul - álemdik tájirıbe. Óıtkeni jedel medıtsınalyq járdem jetkenshe osy apparattardyń kómegimen adam ómirin saqtap qalýǵa bolady", - dedi L.Aqtaeva QazAqparat tilshisine bergen suxbatynda.
KR Anestezıologtary men reanımatologtary qoǵamynyń tóraǵasy Aǵzam Jumadilov atalǵan máseleni búgingi kongrestiń qaýlysynda kórsetýdi kózdeıdi. "Biz shetelde bolyp, solardyń tájirıbesin zerdelep qaıtqanbyz. Ol jaqta áýejaı bolsyn, vokzal bolsyn, barlyq qoǵamdyq jerlerde defıbrıllıatorlar tur. Adamdar qoldana ma, joq pa, ondaı apparattar bar. Ony qoldana biletin mamandar da jumys isteıdi. Olar shuǵyl kómek bere alady. Osy tájirıbeni eskere otyryp, biz búgingi anestezıologtar men reanımatologtardyń II kongresi boıynsha atalǵan máseleni qorytyndy qujatqa engizetin bolamyz", - dedi A.Jumadilov.
Aıta keteıik, Astanada anestezıologtar men reanımatologtardyń II kongresi bastaldy. Plenarlyq májilisti ashqan QR Densaýlyq saqtaý vıtse-mınıstri Lıazat Aqtaeva osy saladaǵy negizgi máselelerdi belgilep berdi.