Barlyq qalalardyń ortalyǵynan Álıhan Bókeıhan atyna laıyqty kóshe berilýi kerek - Qazybek Isa
Osy oraıda «Aq jol» partııanyń fraktsııasy atynan Premer-Mınıstrdiń orynbasary Eraly Toǵjanovtyń atyna saýal joldady, dep habarlaıdy QazAqparat tilshisi.
«Aq jol» fraktsııasy bıyl 3 naýryzda «Alash qaıratkerlerin umyt qaldyrý - saıası ádiletsizdik» atty depýtattyq saýal joldaǵany belgili. Onda óńirlerdegi Alash qaıratkerleriniń esimderi umyt qalyp otyrǵany aıtylǵan edi. Endi anyqtalǵandaı, eleýsiz qalǵandar tek Alash qaıratkerleri ǵana emes, Álıhan Bókeıhan, Ahmet Baıtursynuly, Mirjaqyp Dýlatuly sekildi Alash kósemderiniń ózderi de laıyqty ulyqtalmaı jatqanyna kóz jetkizdik. Bıyl Orta Azııadaǵy tuńǵysh saıası partııa «Alash» partııasyn quryp, Alash Orda úkimetin basqarǵan Álıhan Bókeıhannyń týǵanyna 155 jyl tolýyna arnalǵan is-sharalar Qazaqstan Prezıdenti Qasym-Jomart Toqaevtyń usynýymen Táýelsizdiktiń 30-jyldyǵy baǵdarlamasyna engizildi. Taıaýda 31 naýryzda Túrkistan Deklaratsııasyn qabyldaǵan Túrki keńesi memleketteriniń basshylary Turannyń uly tulǵalarynyń ishinde Álıhan Bókeıhannyń 155 jyldyq mereıtoıyn da birlese atap ótýge sheshim qabyldady», - dedi Q. Isa Májilistiń jalpy otyrysynda.
Osy oraıda ol Qaraǵandydaǵy Oktıabr aýdany endi Álıhan aýdanyna aınalǵanyn eske saldy.
«Degenmen, elimizde Alash kóseminiń atyna laıyqty eshqandaı kóshe joq ekenin anyqtadyq. Astanamyzda Bókeıhanov kóshesi ortalyqta emes, shettegi ol kósheni kóbinese «Máńgilik el» kóshesindegi keptelisten qashqan júrgizýshiler jaqsy biledi. Almatydaǵy Bókeıhanov kóshesi qala shetindegi óndiristik aýdandaǵy bazar artyndaǵy qýysta ornalasqan. Shymkenttiń shetindegi Tassaı aýylynyń tasasynda qalǵan Bókeıhanov kóshesiniń uzyndyǵy 500 metrdeı ǵana, jıyrma shaqty úı ornalasqan, tipti jaryq ta joq. Alash Ordasy atalǵan Semeıde de, oblys ortalyǵy Óskemende de Álıhanǵa laıyqty kóshe joq, shalǵaıdaǵy shaǵyn aýdandardaǵy jıyrma shaqty úıden turatyn shaǵyn kósheler», - dedi depýtat.
Osy oraıda ol «Aq jol» partııasynyń usynysyn jetkizdi.
«Á.Bókeıhannyń negizgi mamandyǵy ormantanýshy-ǵalym, ıaǵnı agronom. Ol qazaqtyń jer-sýyn, dástúrli sharýashylyǵyn zerttegen ekspedıtsııalarǵa qatysyp, qoı, iri qara jáne jylqy tuqymdaryn zerttep, 3 irgeli ǵylymı monografııa, ondaǵan ǵylymı maqala jazǵan, qazaq aýylsharýashylyǵy ǵylymynyń negizin qalaǵan ǵalym. Sondyqtan, onyń esimin Almatydaǵy ázirge aty joq Qazaq ulttyq agrarlyq ýnıversıtetine berý ábden laıyqty. Elordamyzdaǵy Turan men Syǵanaq kósheleriniń qıylysyndaǵy bos turǵan alańǵa «Alash» alleıasyn ashyp, Álıhan eskertkishi men Alash qaıratkerleri bıýsterin ornatý qajet. Elimizdegi barlyq qala ortalyǵynan Álıhan Bókeıhan atyna laıyqty kóshe berilip, Alash alańdary ashylýy tıis», - dedi Qazybek Isa.
