Barlyq eńbekaqylar, áleýmettik tólemder qazirgi deńgeıinde qamtamasyz etilýi tıis - Memleket basshysy
ASTANA. QazAqparat - Barlyq eńbekaqylar, áleýmettik tólemder qazirgi deńgeıinde qamtamasyz etilýi tıis. Bul týraly Memleket basshysy Nursultan Nazarbaev Astana qalasy aktıvimen kezdesý barysynda aıtty.
Memleket basshysy búginde kóptegen elder álemdik ekonomıkadaǵy qıyndyqtarǵa baılanysty úlken syn-qaterlerge kezigip otyrǵanyna toqtaldy. «Turaqsyzdyqtyń ýshyǵýyna Ýkraınadaǵy ahýal men Reseı jáne Eýropa elderi arasyndaǵy ózara sanktsııalar da yqpal etýde. Reseı - bizdiń strategııalyq seriktesimiz, tyǵyz baılanys ornatqan jaqyn kórshimiz. Eger Reseı ekonomıkasyndaǵy ahýal nasharlaıtyn bolsa, ol janama túrde bizge de áser etedi», - dedi Nursultan Nazarbaev.
Qazaqstan Prezıdenti atalǵan úrdisterdiń aldyn úshin qajetti múmkindiktiń bári bar ekenin jáne Úkimet tıisti jumys júrgizip jatqanyn aıtty. «Úkimet bıylǵy jyldyń bıýdjetin qaıta qaraý jóninde usynys engizdi, óıtkeni munaı men metaldyń, sondaı-aq Qazaqstan eksportynyń ózge de ónimderine baǵanyń tómendeýi túsimderdiń azaıýyna ákeledi. Bul rette barlyq eńbekaqylar, áleýmettik tólemder qazirgi deńgeıinde qamtamasyz etilýi tıis», - dedi Memleket basshysy.
