Barlyq eldermen shekarany shegendeý jumysynyń mańyzy zor - Nyǵmatýlın
«Qazaqstan-Túrikmen memlekettik shekarasyn shegendeý 2001 jyly 5 shildedegi Qazaqstan Respýblıkasy men Túrikmenstan arasyndaǵy Qazaqstan - Túrikmen memlekettik shekarasyn delımentatsııalaý jáne ony demarkatsııalaý protsesi týraly shartqa sáıkes júrgizildi. Bul shart QR 2003 jylǵy 2 shildedegi zańmen ratıfıkatsııalanyp, 2006 jylǵy 31 tamyzda kúshine endi. QR men Túrikmenstan arasyndaǵy Qazaqstan-Túrkimen memlekettik shekarasyn shegendeý týraly kelisimge 2017 jylǵy 18 sáýirde Astana qalasynda Túrikmenstan basshysynyń Qazaqstanǵa resmı sapary aıasynda QR Prezıdenti Nursultan Nazarbaev pen Túrikmenstan basshysy Gýrbangýly Berdymýhamedov qol qoıdy. Kelisimniń basty maqsaty - Qazaqstan men Túrikmenstan arasyndaǵy shegendelgen memlekettik shekara syzyǵyn halyqaralyq quqyqtyq negizde bekitý bolyp tabylady», - deıdi zań jobasyn Parlamentte tanystyrǵan QR Syrtqy ister mınıstriniń orynbasary Ǵalymjan Qoıshybaev.
Onyń aıtýynsha, shekarany shegendeý nátıjesinde memlekettik shekara syzyǵynyń uzyndyǵy 458,3 shaqyrymdy quraǵan. Memlekettik shekara syzyǵynda 330 shekaralyq belgi ornatylǵan. Sondaı-aq, vıtse-mınıstr memlekettik shekara jáne shekaralyq belgilerdiń ornalasqan jerin atap ótti.
«Kelisim kúshine engennen keıin memlekettik shekara syzyǵyn saqtaý maqsatynda 10 jylda bir ret birlesip tekserý kózdelgen. Kelisim boıynsha jergilikti jerdegi kez kelgen ózgerister memlekettik shekara syzyǵynyń ótýindegi ózgeristerge alyp kelmeıdi. Kelisimniń erejelerine sáıkes, ol ratıfıkatsııalaýǵa jatady jáne dıplomatııalyq arnalar arqyly onyń aıaqtalǵany týraly sońǵy jazbasha habarlama túsken kúnnen bastap kúshine enedi. Kelisimdi ratıfıkatsııalaý men onyń kúshine enýi memlekettik aýmaqty jáne ulttyq egemendiktiń keńistigi shekterin aıqyndaýǵa, aýmaqtyq daýlardy boldyrmaýǵa múmkindik beredi», - deıdi ol.
Kelisimdi osy jyldyń 30 mamyrynda Túrikmenstannyń Medjılısi ratıfıkatsııalaǵany týraly Túrikmenstannyń Syrtqy ister mınıstrliginiń notasy kelip túsken.
Óz kezeginde QR Parlament Májilisiniń Tóraǵasy Nurlan Nyǵmatýlın el Táýelsizdiginiń eń basty jetistikteriniń biri - bizdiń memlekettiń shekaralas eldermen shekarany belgilep, alǵanyn atap ótti.
«El Prezıdenti Nursultan Nazarbaevtyń sarabdal saıasatynyń arqasynda barlyq perımetr boıynsha qazirgi ýaqytta tatý kórshilik qatynas ornaǵan. Búgingi tańda memleketimiz kórshi eldermen kelisimge kele otyryp, el shekarasyn belgilep aldyq. Qazirgi ýaqytta shekarany shegendeý týraly kelisimderdi Qyrǵyzstan, Ózbekstan elderimen júrgizý josparlanǵan. Bul baǵytta Qytaı elimen jumys aıaǵyna jetti. Qazaqstan men Reseı shekaralaryn shegendeý týraly jumys jalǵasyp jatyr. Sondyqtan barlyq eldermen shekarany shegendeý jumysynyń mańyzy zor», - deıdi Nurlan Nyǵmatýlın.
