Barlyq dinge, bir-birimizge qurmetpen qaraýymyz qajet - Dımash Qudaıbergen

ASTANA. QazAqparat – Álemge tanymal ánshi, otandasymyz Dımash Qudaıbergen Úndistannyń «Hungama» tanymal dıstrıbıýtorlyq kompanııasyna suhbat berdi, dep habarlaıdy QazAqparat tilshisi.

Áleýmettik jelige Dımashtyń atalmysh kompanııaǵa bergen suhbatynan úzindi jarııalandy. Suhbattyń tolyq nusqasy jaqynda jarııalanbaq.

«Meniń oıymsha, kóp eńbektengen adam jetistikke jetedi. Biraq óte mańyzdy másele bar: Biz Qudaıǵa senip, oǵan únemi alǵys aıtyp júrýimiz qajet. Tynbaı eńbek etetin kóptegen adamdy bilemin, olar senen anaǵurlym kóp jumys istep, talanty senen anaǵurlym joǵary bolýy múmkin. Adamdar baı jáne tanymal bolǵan kezde de bul Qudaıdyń syıy ekenin esten shyǵarmaýy tıis», - deıdi D.Qudaıbergen.

Onyń aıtýynsha, ol «Bir aspannyń hıkaıasy» ánin 25 jasynda jaza bastaǵan.

«Seniń qazaq, amerıkalyq, orys ne frantsýz ekeniń mańyzdy emes. Sen bútin álemge meıirimmen qaraýyń kerek. Biz barlyq dinge, bir-birimizge qurmetpen qaraýymyz qajet. Bul – óte mańyzdy.

Qazir álemde soǵys kóp. Ne úshin? Sebebi olar aqsha tapqysy keledi. Iá, olar tabysqa kenelgisi keledi, biraq balalar, olardyń ómiri she? Osy týraly umytamyz. Sondyqtan osy ánimdi ne úshin jazǵanymdy birneshe ǵana adam túsinse de, meniń mıssııam oryndalǵan bolady», - deıdi ánshi.

Aıta ketsek, Hungama Digital Media Entertainment – shtab-páteri Mýmbaıda ornalasqan kompanııa. Ol Úndistandaǵy jetekshi tsıfrlyq oıyn-saýyq kompanııa. Onyń «Hungama Music» jáne «Hungama Play» servısteri bar. Hungama Music-tiń aı saıynǵy paıdalanýshylar sany 65 mıllıonnan asyp jyǵylady.

Foto: instagram.com/dimash_eurasianfanclub