Barlyq din ókilderi qoldasa da, bizde transplantatsııa salasy damymaı tur - Birtanov

NUR-SULTAN. QazAqparat – QR Densaýlyq saqtaý mınıstri Eljan Birtanov elimizde transplantatsııa salasyn jolǵa qoıýdaǵy basty problemalardy atady, dep habarlaıdy QazAqparat tilshisi.

«Bizde transplantologııa - medıtsına men hırýrgııalyq sala retinde damyp keledi. Jalpy, bizdiń hırýrgter transplantatsııanyń barlyq túrlerin meńgergen. Biraq, transplantatsııanyń qajettilikterin qamtamasyz etpeý máselesi bar. Bul - qarjylandyrý emes, donorlyq materıaldyń shektelip qalýyna baılanysty problemalar. Bul jerde áńgime, álbette, iri donorlyq týraly aıtylyp otyr. Zańnamalyq turǵyda barlyq kedergiler joıylǵan. Biraq, qoǵamda qaıtys bolǵan adamnyń denesin kesýge týystary qarsy shyǵyp jatady. Áıtse de, barlyq dinı qaýymdastyqtar bul turǵyda bizdi qoldaıdy», - dedi Úkimettiń baspasóz ortalyǵyndaǵy baspasóz máslıhatynda Eljan Birtanov.

Mınıstrdiń aıtýynsha, musylman elderinde aǵza donorlyǵy jaqsy jolǵa qoıylǵan.

«Dese de, bizdiń eldiń mádenı erekshelikterine saı, donorlyqtyń azdyǵyna qatysty problema bar. Dárigerler transplantatsııany júrgizýge qorqady. Óıtkeni, týǵan-týystary buǵan qarsy. Tipti dárigerlerdi sotpen qýdalaý jaǵdaıy da tirkelgen. Zań boıynsha, tiri kezinde adam aǵzasyn donorlyqqa berýden bas tartpasa, kóptegen elderdegi tájirıbege saı onyń donorlyqqa kelisim bergenin bildiredi. Dese de, halyq ishinde tıisti túsindirý jumystaryn júrgizý kerektigin uǵyp otyrmyz», - dedi Eljan Birtanov.

Mınıstrdiń aıtýynsha, DSM halyqqa túsindirý jumystaryn júrgizý boıynsha konkýrs ótkizýden bas tartqan.

«Óıtkeni, bul konkýrsqa eshkim qatysqysy kelmeıdi. Sol sebepti, biz úkimettik emes uıymdarmen birge jumys júrgizýdemiz», - dedi Eljan Birtanov.