Barlyq baspalar qazaq klassıkteriniń jınaqtaryn qolǵa alyp jatyr
Bul týraly búgin Almatyda Oralhan Bókeıdiń tańdamaly shyǵarmalar jınaǵynyń tusaýkeserinde aıtyldy.
«Qazaq kitaptarynyń nasıhatyn arttyrý maqsatynda 2013-2014 jyldary Qazaqstandaǵy barlyq baspalar maqsatty túrde qazaq klassıkteriniń jınaqtaryn shyǵarmaq. Alǵashqy kitaptar kúzden bastap jaryq kóre bastaıdy dep josparlanyp otyr. Bul shara oqyrmannyń jaqsy kitapty talǵap oqýyna óz septigin tıgizbek. Óıtkeni qazir naryqta bezendirilýi joǵary deńgeıde bolǵanymen sapasy ala-qula baspa ónimderi óte kóp. Olardyń arasynan qajetti kitapty aıyrý qıyndap ketken edi. Sondyqtan bul másele Mádenıet jáne aqparat mınıstrliginde arnaıy talqylanyp, onda qabyldanǵan naqty sharalar qazir óz jemisin bere bastady», - deıdi balalar men jasóspirimder basylymdarynyń «Jas órken» JShS bas dırektory, jazýshy, jýrnalıst Júsipbek Qorǵasbek. «El-shejire» qoǵamdyq qorynyń prezıdenti, «Alash» baspasynyń dırektory Dıdahmet Áshimhanulynyń aıtýynsha, áıgili qalamgerlerdiń endi buryn eshbir jınaqtaryna enbegen shyǵarmalaryn gazet-jýrnaldardan jınap, jınaq etip shyǵarý qajet. Máselen, olar Oralhan Bókeıdiń týǵan jerinen daıyndalǵan «Bizdiń Oralhan» degen kitap shyǵarǵan. Onda qalamgerdiń eshbir jınaqtaryna kirmegen shyǵarmalaryn engizip, «Aýyl hıkaıattaryndaǵy» keıipkerleriniń protıpterin taýyp, estelikterin sýretimen basqan. Qazir endi jazýshynyń 70 jyldyǵyna oraı Mádenıet jáne aqparat mınıstrliginiń qoldaýymen 7 tomdyq shyǵarmalar jınaǵyn daıyndap, baspaǵa jibergen kórinedi.