Barlyq aımaqtardaǵy Nazarbaev Zııatkerlik mektepteriniń oqýshylary Ortalyq kommýnıkatsııalar qyzmetinde boldy
ASTANA. QazAqparat - 9 sáýir kúni elimizdiń barlyq aımaqtaryndaǵy Nazarbaev Zııatkerlik mektepteriniń oqýshylary mektep medıa-forýmy aıasynda QR Prezıdenti janyndaǵy Ortalyq kommýnıkatsııalar qyzmetine keldi.
Oqýshylarmen kezdesý barysynda uıymnyń maqsattary men OKQ qyzmetkerleriniń mindetteri týraly aıtyldy. QR Prezıdenti janyndaǵy Ortalyq kommýnıkatsııalar qyzmetiniń dırektory Erjan Babaqumarov forým qatysýshylaryna uıymnyń basty mindetterin aıta kele, onyń negizgi maqsaty memlekettik organdar qyzmetiniń ashyqtyǵyn arttyrý jáne memlekettiń jumysy týraly qoǵamdy kóbirek aqparatpen qamtamassyz etý bolyp tabylatynyn atap ótti.
Oqýshylar Uly Jeńistiń 70 jyldyq mereıtoıyn ótkizý týraly baspasóz máslıhatyna qatysty.
Baspasóz máslıhatynan keıin, oqýshylar respýblıkalyq teleradıo keshenderiniń stýdııalary men túsirilim pavılondaryn aralap, Qazaqstannyń úzdik jýrnalısterimen júzdesti. Jýrnalıster óz kezeginde balalarǵa zamanaýı medıa-ındýstrııa salasyndaǵy tájirıbelerimen bólisti.
Ekskýrsııadan keıin, oqýshylarǵa «Ortalyq kommýnıkatsııalar qyzmetine kelýdegi áser» atty shyǵarmashylyq baıqaýǵa qatysý jóninde usynys jasaldy.
Jeńimpazdar áleýmettik jeliler men ortcom.kz saıtynda ashyq daýys berý arqyly anyqtalady. Eń úzdik jumystardyń ıeleri estelik gramotalarmen marapattalady.
Aıta keteıik, «QR Prezıdenti janyndaǵy Ortalyq kommýnıkatsııalar qyzmeti» RMM Memleket basshysynyń 2012 jylǵy 5 qazandaǵy № 403 Jarlyǵymen qurylǵan bolatyn. Ortalyq kommýnıkatsııalar qyzmetiniń basty maqsaty - memlekettik organdardyń aqparattyq kooperatsııasyn arttyrý jolymen buqaralyq aqparat quraldary arqyly jurtshylyqqa memlekettik organdardyń resmı ustanymyn jetkizý. Bul óz kezeginde memlekettik organdar men kommýnıkatsııalardyń damýyna, sondaı-aq memlekettik baǵdarlamalardyń oryndalýyn baqylaýda qoǵam róliniń artýyna septigin tıgizedi.
Nazarbaev Zııatkerlik mektep oqýshylary arasyndaǵy medıa-forým Astana qalasynda 9-10 sáýir aralyǵynda ótýde. Forýmǵa elimizdiń barlyq aımaqtaryndaǵy Nazarbaev Zııatkerlik mektepteriniń 17 oqýshysy qatysyp otyr. Medıa-forým alańynda ónerli, belsendi jáne patrıot azamattar toptasqan. Shara ekrannyń ar jaǵyndaǵy ómirmen tanysýǵa, shynaıy baspasóz máslıhattaryna, tok-shoýlarǵa, brıfıngterge qatysýǵa jáne jetekshi arnalardyń jańalyq bólmelerine kirip, BAQ salasyndaǵy belgili jýrnalıstermen kezdesýge múmkindik beredi.
Búginde Nazarbaev Zııatkerlik mektepterinde 11 myńnan astam bala bilim alyp jatyr. Atalmysh bilim ordalary Astana, Almaty, Kókshetaý, Qaraǵandy, Petropavl, Pavlodar, Semeı, Óskemen, Taldyqorǵan, Oral, Aqtóbe, Atyraý, Taraz jáne Shymkent qalalarynda ashylǵan.
