Barlyq aımaqtarda sýdyń deńgeıi tómendep keledi - TJK
NUR-SULTAN. QazAqparat - QR ІІM Tótenshe jaǵdaılar komıtetiniń tóraǵasy Vladımır Bekker sý tasqyny máselesi týraly aıtty, dep xabarlaıdy QazAqparat tilshisi.
«Búginde sý tasqyny qaýpi bar barlyq aımaqtarda sý deńgeıiniń tómendegeni baıqalyp otyr. Máselen, Atbasar qalasynda Jabaı ózeniniń deńgeıi 3 metr 10 santımetrge deıin tómendedi. Sonda bir táýliktiń ishinde sýdyń deńgeıi 45 santımetrge tústi. Menińshe, bıyl Atbasar qalasy sý tasqyny kezeńinen aman-esen ótedi. Erteńnen bastap ony sý tasqyny qaýpi joǵary eldi meken retinde baqylaýdan alyp tastaıtyn shyǵarmyz», - dedi V.Bekker elordada ótken baspasóz máslıxatynda.
Komıtet basshysynyń sózine qaraǵanda, Astraxan aýdanynyń Eski Kolýton, Kolýton men ıAgodnaıa eldi mekenderinde de sýdyń deńgeıi birtindep túsip keledi. Bir táýliktiń ishinde sýdyń deńgeıi 12 santımetrge tómendedi.
«Al eki táýliktiń ishinde sýdyń deńgeıi 21 santımetrge tústi. Buǵan deıin 20 úıdiń aýlasyna sýdyń kirgeni jaıynda aıtqan bolatynbyz. 10 úıdiń aýlasynan sý ketti. Endi, taǵy 10 úı qaldy. Kólik júretin joldy da sý alyp ketken edi. Onyń uzyndyǵy da qysqaryp keledi. Qazir 150 metrden asyp otyr. Al sýdyń deńgeıi 60 santımetr bolyp tur. Ázirshe, avtokólikter úshin qozǵalys jabyq», - dep atap kórsetti V.Bekker.
Shyǵys Qazaqstan oblysynyń Besqaraǵaı aýdanynda da sýdyń deńgeıi tómendedi. Ertistiń sýy shamamen 10-15 santımetrge tústi. Muz keptelisi áli bar. Degenmen, seń aqyryndap Pavlodar oblysyna qaraı jyljyp keledi. «Kesheden beri respýblıka boıynsha turǵyn úıler men avtojoldardy sý basý oqıǵalary tirkelgen joq», - deıdi V.Bekker.
Aıta keteıik, búgingi brıfıngte komıtet tóraǵasy Pavlodar oblysynda Ertis ózeniniń tasýynan qaı aýyldarǵa qaýip tónip turǵanyn aıtty. Budan bólek, elordaǵa jaqyn Qosshy kentiniń máselesi jaqyn arada sheshiletinin málimdedi.
