Barlyq astanalyqtar aǵylshyn tilin tegin oqı alady
ASTANA. QazAqparat - Elordanyń Ǵashyqtar saıabaǵynda dúısenbiden bastap senbige deıin «Tilder saıabaǵynda» tegin til kýrsy ótedi, dep habarlaıdy QazAqparat tilshisi «Esil» aýdany ákimdigine silteme jasap.
Joba aıasynda qazaq, orys jáne aǵylshyn tilin úırengisi kelgen adamdardyń toby jasaqtalady. Til úırengisi kelgender myna silteme arqyly ótip tirkelýi qajet.
Qazirdiń ózinde Beginner jáne Elementary deńgeıleri boıynsha ótetin sabaqtardyń kestesi bar. Oqý quraldary tegin beriledi.
Sabaq kestesi tómendegideı:
Dúısenbi, sársenbi, juma kúnderi: saǵat 9:30-11:00-de - 14-18 jastaǵy jasóspirimder; saǵat 11:00-12:30-da - 14 jasqa deıingi balalar; 18:30-20:00-da - jas 18-den asqan eresekter.
Seısenbi, beısenbi, senbi kúnderi: (jańa toptar): saǵat 9:30-11:00-de - 14 jasqa deıingi balalar; 11:00-12:30-da - 14-18 jastaǵy jasóspirimder; 18:30-20:00-de - jasy 18-den asqan eresekter.
«Joba aıaqtalǵannan keıin qatysýshy synaq tapsyrǵan jaǵdaıda kýrstan ótkendigi týraly sertıfıkat alady. Búgin, 18 tamyzda baǵdarlama boıynsha karaoke bolady. Bastalýy - 18-00», - delingen «Esil» aýdany ákimdiginiń Feısbýktegi resmı paraqshasynda taratylǵan aqparatta.
