Barlyq arnaıy ekonomıkalyq aımaqtardyń ınfraqurylymy 2019 jyly tolyǵymen aıaqtalady
ASTANA. QazAqparat - Elimizdegi barlyq 10 ekonomıkalyq aımaqtyń ınfraqurylymy 2019 jylǵa qaraı tolyǵymen aıaqtalady. Bul týraly búgin Senattyń Ekonomıkalyq saıasat, ınvestıtsııalyq damý jáne kásipkerlik komıtetiniń otyrysynda «Qazaqstan Respýblıkasynyń keıbir zańnamalyq aktilerine arnaıy ekonomıkalyq aımaqtardy jetildirý máseleleri boıynsha ózgerister men tolyqtyrý engizý týraly» zań jobasyn talqylaý barysynda málim boldy.
«Arnaıy ekonomıkalyq aımaqtar qurý tájirıbesi elimizde 1991-1996 jyldary qolǵa alynǵan bolatyn. Ol kezderi Jezqazǵan, Taldyqorǵan, Mańǵystaý, Shyǵys Qazaqstan oblystarynda, Almaty qalasynda osyndaı erkin saýda aımaqtary qurylǵany este. Bul arnaıy ekonomıkalyq aımaqtar óz maqsattaryna qol jetkize almady. Al osy sátsiz tájirıbeden búgingi aıyrmashylyqqa kelsek, ol tustary memleketimizde arnaıy ekonomıkalyq aımaqtar úshin ınfraqurylymdar salatyn jaǵdaı bolmady», - dedi QR Investıtsııalar jáne damý vıtse-mınıstri Raqym Oshaqbaev.
Onyń sózine qaraǵanda, qazirgi tańda memleket elimizdiń arnaıy ekonomıkalyq aımaqtaryndaǵy ınfraqurylymdardy damytýǵa 261 mlrd teńge bólgen. «Elimizdegi 10 arnaıy ekonomıkalyq aımaqtyń 6-ynda ınfraqurylym aıaqtaldy. 2019 jylǵa qaraı barlyq AEA ınfraqurylymyn tolyǵymen aıaqtaý kózdeledi. Qazirgi tańda aımaqtarǵa 136 kompanııa tartylyp, olar óz qyzmetterin atqaryp jatyr», - dedi R. Oshaqbaev.
Aıta keterligi, keltirilgen málimetterge qaraǵanda, arnaıy ekonomıkalyq aımaqtarǵa qazirge deıin salynǵan ınvestıtsııalar mólsheri 375 mlrd. teńgege jetip otyr. Al josparǵa sáıkes, 2019 jylǵa deıin jeke ınvestıtsııalar boıynsha shamamen 2 trıllıon teńgeni quraıtyn jobalar júzege asyrylmaq.
