Barlyq «Altyn belgi» ıegerleri jańa oqý jylynda grantqa ıe bolady - A. Sárinjipov
ASTANA. QazAqparat - Barlyq «Altyn belgi» ıegerleri jańa oqý jylynda grantqa ıe bolady. Bul týraly búgin Aqordada QR Memlekettik hatshysy Gúlshara Ábdiqalyqovanyń 2015-2016 jańa oqý jylynyń qarsańynda elimizdiń bilim berý júıesiniń qyzmetkerlerimen kezdesýi aldynda Bilim jáne ǵylym mınıstri Aslan Sárinjipov málim etti.
«Barlyq joǵary oqý oryndary oqý jylyn bastaýǵa daıyn. 25 tamyzǵa deıin qujat qabyldaý júrgiziledi. Aǵymdaǵy jyly 30 myńnan astam grant bólindi, konkýrstar ótti jáne 25 tamyzda buıryqqa qol qoıylady. Bıyl bizde UBT nátıjesi elimiz boıynsha ótken jylǵa qaraǵanda joǵary boldy. Shekti ball deńgeıin eńsergen balalardyń qatary da artyp otyr. Bizde 2 myńnan astam «Altyn belgi» ıegeri grant aldy. Memlekettik tapsyrys az ornalastyrylǵan mamandyqtardy tańdap, memlekettik grantqa ilige almaǵan «Altyn belgi» ıegerleriniń barlyǵy da grantpen qamtamasyz etiledi nemese kásiporyndardyń demeýshilik kómegimen oqýǵa qabyldanady. Sondyqtan oqý jyly basynda barlyq «Altyn belgi» ıegerleri grant alatyn bolady», - dedi A.Sárinjipov.
Sonymen qatar mınıstr erteń Ortalyq kommýnıkatsııalar qyzmetinde brıfıng ótip, onda oqý jylyna daıyndyq boıynsha tolyq statıstıka jarııa etiledi. Munan bólek, dál osy máselege oraı senbi kúni Úkimet otyrysy ótedi.
Aıta keteıik, bıyl 39 «Altyn belgi» ıegeri memlekettik grantqa ilikpeı qalǵan bolatyn.
