Barlyq áleýmettik mindettemeleri belgilengen merzimde oryndalady - mınıstrlik
QR Eńbek jáne halyqty áleýmettik qorǵaý mınıstrligi memlekettiń 2022 jylǵa kózdelgen barlyq áleýmettik mindettemeleri belgilengen merzimde tolyq kólemde oryndalatynyn habarlaıdy.
Qazaqstanda 2022 jylǵy 1 qańtardan bastap jasyna baılanysty zeınetaqy mólsheri 7% - ǵa, bazalyq zeınetaqy men memlekettik járdemaqy mólsheri 5% - ǵa ulǵaıdy. Bul shara 4,5 mıllıon alýshyǵa qatysty bolady.
Memleket basshysynyń tapsyrmasyna sáıkes 2022 jylǵy 1 qańtardan bastap eń tómengi jalaqy mólsheri 41% - ǵa, 42 500-den 60 000 teńgege deıin ulǵaıtyldy. Osynyń arqasynda shamamen 1 mln 650 myń jumyskerdiń aqshalaı kiristeri ósedi.
Aǵymdaǵy jylǵy 8 qańtardaǵy jaǵdaı boıynsha zeınetaqy men járdemaqy alýshylardyń shottaryna 176,8 mlrd teńge aýdaryldy. Osy jylǵy qańtarda zeınetaqy men járdemaqy tóleýge kózdelgen barlyq qarajat ekinshi deńgeıdegi bankterdiń jumysyn qalpyna keltirý kezinde belgilengen tártipke jáne bekitilgen kestege sáıkes alýshylardyń shottaryna túsedi.
Sonymen qatar, 2021 jyldyń 4-toqsanynda ataýly áleýmettik kómek alǵan azamattarǵa tólemder Tótenshe jaǵdaı rejıminiń qoldanylýyna baılanysty aǵymdaǵy jyldyń 1-toqsanyna avtomatty túrde uzartylatyn bolady, bul shara 88 myń otbasyn nemese 432 myń adamdy qamtıdy.
Qaıta kýálandyrý merzimi bastalatyn múgedektigi bar adamdarǵa buryn belgilengen toby boıynsha múgedektik Tótenshe jaǵdaı rejıminiń qoldanylý ýaqytyna uzartylatyn bolady. Bul shara 2700 adamdy qamtıdy.
