Barlyq ýnıversıtetti apattan zardap shekkenderdi qoldaýǵa shaqyramyn – Talǵat Nárikbaev

ASTANA. KAZINFORM – Maqsut Narikbayev University basqarma tóraǵasy Talǵat Nárikbaev Memleket basshysynyń sý tasqyny saldaryna qatysty úndeýi týraly pikir bildirip, qıyndyqqa tap bolǵan azamattardy el bolyp qoldaýǵa shaqyrdy.

Ol ýnıversıtet atynan kómek qolyn sozýǵa daıyn ekenin atap ótti jáne barlyq ýnıversıtetti apattan zardap shekkenderdi qoldaýǵa shaqyrdy.

«Memleket basshysynyń sý tasqyny saldaryna qatysty úndeýin tyńdap shyqtym. Ashyǵyn aıtý kerek, qazirgi tańda qıyn jaǵdaıda qalǵan halqymyzǵa jyly sóz óte mańyzdy. Prezıdenttiń tapsyrmasymen halyqqa kómektesý úshin úkimet memlekettik materıaldyq rezervti paıdalanatyn boldy. Sondaı-aq shyǵyndardy óteýdi tolyǵymen úkimet jaýapkershilikke alady. Apattyq jaǵdaıda elimizdiń birlikte bolýy, al qıyndyqqa tap bolǵan azamattardy el bolyp qoldaýymyz kerek. Biz de óz tarapymyzdan ýnıversıtetimizdiń atynan kómek qolyn sozýǵa daıyn ekenimizdi bildirgim keledi. Arnaıy qorlarǵa qarajat aýdaramyz dep sheshim qabyldadyq. Barsha ýnıversıtetterdi osyndaı apatty jaǵdaıda qoldaýǵa shaqyramyn», - dedi Talǵat Nárikbaev.