Barlyq transshekaralyq habqa jol salynyp jatyr – mınıstr
ASTANA. KAZINFORM – Qazaqstandaǵy barlyq transshekaralyq hab kólik ınfraqurylymymen qamtamasyz etilgen. Bul týraly Kólik mınıstri Nurlan Saýranbaev Úkimet otyrysynda aıtty.
Atap aıtqanda, «Ortalyq Azııa» ónerkásiptik kooperatsııasynyń halyqaralyq ortalyǵy boıynsha Darbaza – Maqtaaral jańa temirjol jelisiniń qurylysy jalǵasyp jatyr, ol 2026 jyly aıaqtalady. Bul joba Maqtaaral aýdanyn magıstraldi temirjol jelisimen qosady.
– Memlekettik kirister komıteti bıyl «Atameken» avtomobıl ótkizý pýnktin jańǵyrtý jumystaryn aıaqtady. Ótkizý pýnktine baratyn avtomobıl jolyn ortasha jóndeý jumystary aıaqtaldy. Al Eýrazııa transshekaralyq saýda ortalyǵy temirjol jelisine Poıma stantsııasy arqyly qosylady, paıdalanýǵa kelesi jyly beriledi, – dedi N.Saýranbaev.
Sonymen birge, jalpy uzyndyǵy 144 shaqyrym «Podstepnoe-Fedorovka» avtomobıl jolyn rekonstrýktsııalaý jumysy júrgizilip jatyr, onyń ishinde 72 shaqyrym osy jyly respýblıkalyq bıýdjet esebinen, qalǵan 72 shaqyrym 2026 jyly aıaqtalady. Budan bólek, 2027 jylǵa deıin Tasqala avtomobıl ótkizý pýnktin modernızatsııalaý josparlanǵan, qurylys jumystary keler jyly bastalady.
– Qorǵas baǵytynda «Altynkól – Jetigen» temirjol ýchaskesin jańǵyrtý jumystary júrgizilip jatyr. Joba ýchaskeniń ótkizý qabiletin 25 mln tonnaǵa deıin arttyrýǵa múmkindik beredi. Jumystar 2026 jyly tolyǵymen aıaqtalady. Sondaı-aq «Nur joly» avtomobıl ótkizý pýnktiniń aınalma joly ortasha jóndeýden ótip, jyl sońyna deıin qoldanysqa beriledi, – dedi mınıstr.
Indýstrıaldyq saýda-logıstıka kesheni Jambyl oblysynda Qyrǵyzstanmen shekarada, «Batys Eýropa – Batys Qytaı» dáliziniń boıynda ornalasqan. Onda Qarasý-Masanshy-Sarytóbe avtomobıl jolyna ortasha jóndeý júrgizilip jatyr, bul jumystar 2026 jyly aıaqtalady.
Kelesi jyly Qarasý – Aqtilek avtomobıl ótkizý pýnktin modernızatsııalaý bastalady. Joba barysynda ınvestor qarajatyna Shý ózeni arqyly taǵy bir kópir salý máselesi pysyqtalyp jatyr.
Aıta keteıik, Qazaqstanda 2030 jylǵa deıin 5 transshekaralyq hab ashylady.