Barlyq óńirde Halyqaralyq balalardy qorǵaý kúnine arnalǵan aýqymdy is-sharalar ótedi

22–30 mamyr aralyǵynda elimizdiń barlyq óńirinde Halyqaralyq balalardy qorǵaý kúnine arnalǵan keń aýqymdy is-sharalar bastalady, dep habarlaıdy QR Oqý-aǵartý mınıstrliginiń baspasóz qyzmeti.

Bıyl bul bastama «Qazaqstan balalary» degen ortaq uranmen ótýde. Bul uran árbir bala óziniń mańyzdy ekenin sezinip, daýysynyń estilgenin, quqyǵynyń qorǵalǵanyn bilýi tıis degen basty ıdeıany bildiredi.

​Іs-sharalardyń maqsaty balalarǵa qýanysh syılaý ǵana emes, sonymen qatar olardyń balalyq shaǵyna qamqorlyq kórsetý – memlekettik saıasattyń basty basymdyǵy ekenin kórsetý.

​Búkil respýblıka boıynsha barlyq aýyl, aýdan jáne qala bul merekelik bastamaǵa belsene qatysady. Іs-sharalar balalardy eldiń mádenı, bilim berý jáne qoǵamdyq ómirine keńinen tartýǵa baǵyttalǵan.

Atalǵan is-sharalardy QR Oqý-aǵartý mınıstrligi tıisti memlekettik, jergilikti atqarýshy organdarmen jáne qoǵamdyq uıymdarmen birlesip uıymdastyrýda.

Mereke kúnderi kelesi baǵyttar boıynsha is-sharalar ótkiziledi. Oblys, qala jáne aýdan ákimderiniń balalarmen kezdesýleri ótedi. Bul kezdesýlerde balalar óz usynystarymen, arman-maqsattarymen bólise alady. Sonymen qatar osy kúnderi jańa bilim berý nysandarynyń ashylýy josparlanǵan. Teatrlar, murajaılar, saıabaqtar men kınoteatrlarǵa tegin nemese jeńildikpen barý múmkindigi qarastyrylǵan. Oǵan qosa, balalarǵa qoldaý kórsetýge baǵyttalǵan óńirlik qaıyrymdylyq aktsııalary uıymdastyrylady.

Bul – jaı ǵana mereke emes. Bul – balalardyń mańyzdy ekenin kórsetetin qoǵamdyq úndeý. Balalarǵa qamqorlyq – árbir azamattyń ortaq mindeti, adamgershilik boryshy.

Qazaqstandyq ​balalardy osy is-sharalarǵa belsendi qatysýǵa, óz oılary men bastamalaryn, armandaryn ashyq aıtýǵa shaqyramyz. Ár balaǵa ózin estilgen, baǵalanǵan jáne qamqorlyqta ekenin sezinýge tolyq múmkindik beriledi.

Buǵan deıin jazǵy kanıkýlda balalarǵa arnalǵan qandaı sporttyq is-sharalar ótetini habarlandy.