Barlyq oblys aýylǵa keletin jas dárigerlerge kóterme qarajat bólýi kerek

ASTANA. KAZINFORM — 1 qarashaǵa deıin zamanaýı perınataldyq ortalyqtar qujattamasy ázirlenip, Shymkent pen Qaraǵandyda qurylysty bastaý qajet. Bul týraly Úkimet basshysy Oljas Bektenov tapsyrma berdi.

— Densaýlyq saqtaý mınıstrligi ákimdiktermen birlesip, qoldanystaǵy jáne jańadan ashylatyn densaýlyq saqtaý nysandaryn medıtsınalyq mamandarmen jasaqtaý jóninde túbegeıli sharalar qabyldasyn. Biz jyl saıyn kadr tapshylyǵyn azaıtýǵa tıispiz. Bul kórsetkish Densaýlyq saqtaýdy damytýdyń 2030 jylǵa deıingi jańa tujyrymdamasynda kórinis tabýy kerek, — dedi O. Bektenov Úkimettiń búgingi otyrysynda.

Premer-Mınıstr óńir ákimdikterine bosandyrý jáne balalar uıymdarynyń ınfraqurylymyn jaqsartý jáne materıaldyq-tehnıkalyq bazasyn nyǵaıtý jóninde naqty sharalar qabyldaýdy tapsyrdy.

— Barlyq óńirlerde aýylǵa jumys isteýge keletin jas dárigerlerge kóterme qarajattyń bólinýin qamtamasyz etý mańyzdy. Densaýlyq saqtaý mınıstrligi, ulttyq ǵylymı ortalyqtar dıagnostıka men emdeý sapasyn jaqsartý úshin óńirlik medıtsınalyq uıymdarǵa jańa tehnologııalar transfertin turaqty negizde qamtamasyz etýge tıis, — dedi Úkimet basshysy. 

Buǵan deıin Densaýlyq saqtaý mınıstri Aqmaral Álnazarova aýylǵa jumys isteý úshin kelgen suranysqa ıe dárigerlerdiń 8,5 mln teńge kóterme tólemaqy alýǵa múmkindigi bar ekenin, alaıda Aqmola, Jambyl, Batys Qazaqstan jáne Abaı oblystarynda kóterme tólemaqy qarastyrylmaǵanyn aıtqan edi.