Barlyq keden beketinde «qyzyl túıme» ornatyldy: ol ne úshin qajet

ASTANA. KAZINFORM — Barlyq keden beketi men kedendik resimdeý ortalyqtarynda (KRO) «qyzyl túıme» ornatyldy. QR-kodty skanerleý arqyly azamattar men syrtqy ekonomıkalyq qyzmetke qatysýshylar týyndaǵan másele boıynsha MKK tóraǵasyna tikeleı júginýge múmkindik alady. 

— Bul qural keden qyzmetterin alý kezinde týyndaıtyn qıyndyqtarǵa jedel áreket etýge jáne qyzmetkerler tarapynan ádepsiz minez-qulyqtyń aldyn alýǵa baǵyttalǵan, — delingen Memlekettik kirister komıtetiniń habarlamasynda.

Ótinimdi berý formasy qarapaıym ári túsinikti, ony birneshe mınýt ishinde toltyrýǵa bolady. Qalaýyńyz boıynsha ótinimdi anonımdi túrde joldaýǵa múmkindik bar.

— Biz azamattarmen jáne bıznes-qoǵamdastyqpen ashyq ári ádil dıalog ornatýǵa umtylamyz. Árbir kelip túsken ótinim qysqa merzimde qaralyp, tıisti sharalar qabyldanady. Kedergilerge nemese sapasyz qyzmet kórsetýge tap bolǵan árbir adamdy osy múmkindikti paıdalanýǵa shaqyramyz. Sizdiń daýysyńyz — tıimdi, ashyq ári klıentke baǵyttalǵan kedendik ákimshilendirý júıesin qalyptastyrýdyń mańyzdy bóligi. Memleket pen qoǵamnyń birlesken kúshi ǵana servıstiń sapasy men senim deńgeıin arttyra alady, — delingen habarlamada. 

Aıta ketelik Oljas Bektenov Keden qyzmetine quqyq qorǵaý organynyń fýnktsııalaryn berý qajet degen edi.