Barlyq kásibı zańgerler Sot tóreligi akademııasynda tegin oqı alady
ASTANA. KAZINFORM – QR Joǵary Sot Keńesi janyndaǵy Sot tóreligi akademııasynyń rektory Qanat Mýsın Ortalyq kommýnıkatsııalar qyzmeti alańynda akademııaǵa qabyldaý qaǵıdalarynyń jańartylýy men sýdıa kadrlaryn daıarlaý baǵytyndaǵy ózgerister týraly aıtty.
Onyń sózinshe, Akademııa úshin qabyldaý naýqanynyń mańyzy erekshe. Sebebi ashyq ári obektıvti irikteý arqyly sot júıesiniń bolashaq kadrlyq rezervi qalyptasady.
– Keıingi jyldary qabyldaý qaǵıdalary edáýir jańartyldy. Negizgi ózgeristerdiń biri – bilim alýǵa qoljetimdiliktiń keńeıýi. Buryn bıýdjet negizinde oqýǵa túsý múmkindigi negizinen memlekettik organdar qyzmetkerlerine berilse, 2025 jyldan bastap jumys ornyna qaramastan barlyq kásibı zańgerler úshin tegin oqý múmkindigi qarastyryldy, - dedi Qanat Mýsın.
Rektordyń aıtýynsha, búginde Akademııaǵa memlekettik qyzmetshilermen qatar advokattar, notarıýstar, zań keńesshileri, korporatıvtik zańgerler, jeke sot oryndaýshylary jáne memlekettik emes sektordyń ózge de ókilderi túse alady.
Onyń pikirinshe, bul sheshim sýdıa mamandyǵyna teń qoljetimdilikti qamtamasyz etip, sot júıesiniń kadrlyq rezervin keńeıtýge múmkindik beredi.
Akademııadaǵy bilim alýǵa degen joǵary qyzyǵýshylyq sońǵy qabyldaý naýqandarynyń nátıjelerinen de baıqalady. Bıyl bir orynǵa shamamen 10 úmitkerden kelgen. Oqýǵa túsýshiler qatarynda zań salasyndaǵy túrli mamandyq ıeleri bar.
Sonymen qatar rektor Akademııa ınfraqurylymyn damytý baǵytynda atqarylǵan jumystarǵa toqtaldy.
– Alǵash ret bilim alýshylardy praktıkalyq daıarlaý úshin krımınalıstıkalyq polıgon quryldy. Oqý protsesin basqarýdyń zamanaýı aqparattyq júıesi engizildi. Bilim berý ortasyn tsıfrlandyrý jumystary jalǵasyp jatyr, - dedi ol.
Qanat Mýsınniń atap ótýinshe, atalǵan ózgeristerdiń barlyǵynyń negizgi maqsaty – sýdıa kadrlaryn daıarlaý sapasyn arttyrý.
Eske sala keteıik, Memleket basshysy sot isin jeńildetýge qatysty usynys aıtqan edi.
