Barlyq halyq atqa minbeýi múmkin, al sadaqpen oq atpaǵan halyq az – Mergender bapkeri júlde alýdyń qıyndyǵy týraly
ASTANA. KAZINFORM — Búgin 5-shi Dúnıejúzilik kóshpendiler oıyndarynda Dástúrli sadaq atýdyń jamby nysanasyn kózdeýden saıys ótip jatyr. Ázirge 4 qazaqstandyq mergen jartylaı fınalǵa shyqty. Bul rette Dástúrli sadaq atýdan Qazaqstan quramasynyń bas bapkeri Dıas Ahmetov bul jarystyń qıyndyǵy nede ekenin aıtyp berdi.
«Dástúrli sadaq atýda júlde alý óte qıyn, óıtkeni bul – álemniń kóptegen elinde damyǵan sport. Sadaq ár ulttyń, ár halyqtyń tól qarýy bolyp esepteledi. Barlyq halyq atqa minbese de, sadaqpen oq atpaǵan halyq kemde-kem. Bizge eń kóp memleketten – 33 elden 180 sportshy kelip baq synap jatyr. Keı memleketter sadaq atýda bizden ilgeri damyp ketti, olarmen saıysqa túsý bizge ońaı bolǵan joq. Bıylǵy kóshpendiler oıyny Qazaqstanda ótetinin bilgen sátte-aq daıyndyqty bastap kettik», - deıdi D.Ahmetov tilshilerge bergen suhbatynda.
Onyń aıtýynsha, elimizde Dástúrli sadaq atý federatsııasy alǵash ret 2019 jyly quryldy. Al 2022 jyly dástúrli sadaq atýdan tuńǵysh QR chempıonaty ótken.
«Qazir óńirlerde sadaq atý úıirmeleri kóptep ashylyp jatyr. Áýesqoı sportshylardy sanamaǵanda, Qazaqstanda 3-4 myńǵa jýyq kásibı sadaqshymyz bar dep oılaımyz. Onyń ishinde 1500 qyz bar. Jyl basynan beri ulttyq quramanyń úzdik 36 sportshysynyń arasynan 10 sportshyny iriktep aldyq. Sol 10 sportshy qazir el namysyn qorǵap jatyr. Oıyn bastalǵaly alǵashqy altyn, eki qola jáne kúmis aldyq», - deıdi spıker.
Sondaı-aq, aýa raıy jaǵdaıy da sadaqshylarǵa áserin tıgizbeı qoımaıdy.
«Eki kún buryn qatty jel men sýyq boldy. Bul sadaqshylarǵa áserin tıgizedi. Sol úshin nysana kózdegende jel oń jaqtan soqsa – ońǵa qaraı jáne kerisinshe túzetý jasaımyz. Sheteldik jarystarda biz qyzyǵyp qaraıtyn sportshylar qazir kóshpendiler oıynyna qatysyp, bizben qarsylas bolyp jatyr. Máselen, majarstandyq Laslo Kochka – álemdik jarystardyń jeńimpazdy. Reseı, Mońǵolııa, Qyrǵyzstan, Malaızııa, Majarstan, Indonezııa mergenderi de óte myqty jáne halyqaralyq jarystarda úzdik oıyn kórsetedi», - deıdi D. Ahmetov.
Sonymen birge, dástúrli sadaqshylar ustalyqty da qatar damytyp, aǵash túrlerin zertteýmen, jebe jasaýmen aınalysyp júr.
«5 jyl buryn sadaq atý sportyn alǵash bastaǵanda materıaldyq bazamyz bolǵan joq. Ne sadaǵymyz joq, ne jebemiz joq, bárin syrtqy elderden tapsyryspen alyp júrgen edik. Bul sportshy úshin óte qıyn. Qazir memleket qoldaý kórsetip, otandyq ónimdi damytyp, sadaq pen oq jasaıtyn tsehtar ashyldy. Qazir qurama komandamyzdyń 90 paıyzy ózimizdiń ónimdi qoldanady», - dedi Dıas Ahmetov.
Aıta keteıik, saıystyń alǵashqy kúni Jánibek Qulmyrzaev Pýta nysanasyn kózdeýde altyn júlde jeńip alǵan edi.
Sonymen birge, otandyq mergen Erbol Tápenov kúmis, Qanat Qasymhan – eki qola jáne Aıkórkem Batıhan – taǵy bir qola júldeni el qanjyǵasyna saldy.
Búgin Jamby nysanasyn kózdeýde erler arasynda qazaqstandyq Jánibek Qulmyrzaev pen Baqbergen Sálim aqtyq saıysqa shyqty.
