Barlyq balabaqshany ne úshin lıtsenzııalaý kerek bolyp jatyr

ASTANA. KAZINFORM — Oqý-aǵartý vıtse-mınıstri Edil Ospan elimizdegi mektepke deıingi bilim berý uıymdaryn baqylaý is-sharalaryna qatysty túsinik berdi.

- Búgin Senatta maquldanǵan zań normasyna sáıkes, menshik nysanyna qaramastan barlyq mektepke deıingi bilim berýi uıymdaryn lıtsenzııalaý engiziledi. 2011 jylǵa deıin jalpy elimizdegi balabaqshalarǵa lıtsenzııalaý bolǵan. Endi 2027 jyldan bastap lıtsenzııalaý tártibi qaıtarylady, - dedi E. Ospan Senattyń jalpy otyrysynan keıin tilshiler suraǵyna jaýap bere otyryp. 

Onyń aıtýynsha, bul sheshim balalardyń quqyǵyn qamtamasyz etýdi kúsheıtýge, mektepke deıingi bilim sapasyn arttyrýǵa baǵyttalǵan. 

- Lıtsenzııalaý kezinde qaýipsizdikpen qatar, balabaqshalardyń materıaldyq-tehnıkalyq jabdyqtalýyna qatysty talaptar qoıylady, - dedi vıtse-mınıstr. 

2011 jyldan beri balabaqshalar jumysyn bastaý úshin lıtsenzııa almaıdy, tek qana jumysyn bastaǵany týraly habarlama beredi.

Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine memlekettik nagradalar, bilim berý jáne balanyń quqyqtaryn qorǵaý máseleleri boıynsha ózgerister men tolyqtyrýlar engizý týraly» Zańy eki oqylymda qaralyp, maquldandy. 

Zań aıasynda 2027 jylǵy 1 qańtardan bastap mektepke deıingi tárbıe berý men oqytý salasynda qyzmet kórsetetin uıymdardy lıtsenzııalaý tártibi engizildi.

Eske salsaq, bıyl qarasha aıynda Májilis depýtaty Edil Jańbyrshın balabaqshalardy lıtsenzııa arqyly baqylaý tetigin tezirek engizýdi usyndy.