Barlyq aımaqta bir tıptik úı salynady – Qanat Bozymbaev
AQTÓBE. KAZINFORM – Aqtóbe oblysyna jumys saparymen QR Premer-mınıstriniń orynbasary Qanat Bozymbaev keldi. Sý tasqynynan zardap shekken otbasylarmen kezdesip, aldaǵy atqarylar jumys jaıyn aıtty.
Aqtóbe oblysynda 1400-den astam jer úı men baý-baqsha ujymdaryndaǵy 3 myńnan astam úıge sý kirdi.
«Jalpy aıtqanda 4600-den astam úıdi jóndeý nemese salý kerek. Bul jumysty qolǵa alý úshin oblysqa kelip otyrmyn. Biraz úılerdi qaradym. Sonymen birge osy saparda «Vernyı kapıtal» KT, ERG kompanııalar toby men BI Group basshylary men ókilderi kelip otyr. Olar negizinde úılerdi satyp alýǵa nemese salýǵa, jóndeýge tıisti qarajat bólip jatyr. Al buzylǵan jol, kópir, elektr torybyna qarjy bıýdjet esebinen tólenedi. Qazir tehnıkalyq-ekonomıkalyq negizdeme, jobalyq-smetalyq qujatty saraptamadan ótkizip, Qarjy mınıstrligi arqyly qarjy bólinedi. Tez arada úılerdi, páterlerdi satyp alamyz nemese 2-3 aıda jóndeımiz, jańa jer úıler salamyz. Úsh demeýshi qurylys, satyp alý, jóndeý úshin 27-30 mlrd teńge bóledi», - dedi QR Premer-mınıstriniń orynbasary Qanat Bozymbaev.
Vıtse-premerdiń aıtýynsha, elimiz boıynsha aýdany 80 sharshy metr bolatyn bir tıpti úıler salynady dep josparlanǵan. Alaıda demeýshiler kómegimen kópbalaly, múgedektigi bar adamdarǵa ózgeshe jaǵdaı jasaýǵa múmkindik bar. Bul jumysty jergilikti jerde oblys ákimderi úılestire alady.
«Oblysta 136 shaqyrym avtomobıl joldary, 15 kópir zaqymdandy. Sonymen birge 23 áleýmettik nysan men 84 shaǵyn jáne orta bıznes sýbektisi zardap shekti. Jergilikti bıýdjetten 7,8 mlrd teńge bólindi. Úılerdi qalpyna keltirýge, turmystyq tehnıka men jıhazdyń shyǵynyn óteý úshin 4,1 mlrd teńge qarastyryldy. Qazirgi tańda baǵalaý jáne tehnıkalyq tekserýden ótken úılerge 600 mln teńge tólendi. Sonymen birge jedel kómek kórsetý aıasynda 2700 otbasyna 100 AEK kóleminde 877 mln teńge birjolǵa tólem berildi», - dedi Aqtóbe oblysynyń ákimi Ashat Shaharov.
Foto: Aqtóbe oblysy ákiminiń baspasóz qyzmeti
