Qazaqstannyń Kenııadaǵy Elshisi endi Rýandadaǵy dıplomatııalyq mıssııany qosa atqarady

ASTANA. KAZINFORM - Qazaqstan Respýblıkasynyń Afrıkadaǵy dıplomatııalyq ókildigi keńeıe tústi. Bul týraly Aqordanyń baspasóz qyzmeti habarlady.

- Memleket basshysynyń Jarlyǵymen Qazaqstan Respýblıkasynyń Kenııa Respýblıkasyndaǵy Tótenshe jáne Ókiletti Elshisi Barlybaı Kárimuly Sadyqov Qazaqstan Respýblıkasynyń Rýanda Respýblıkasyndaǵy Tótenshe jáne Ókiletti Elshisi qyzmetin qosa atqarýshy bolyp taǵaıyndaldy, - delingen habarlamada.

Barlybaı Sadyqov 1964 jyly 25 qyrkúıekte týǵan.

1988 jyly KSRO Qorǵanys mınıstrliginiń Áskerı ınstıtýtyn ýrdý jáne aǵylshyn tili boıynsha aýdarmashy-referent mamandyǵy boıynsha bitirgen.

Dıplomatııalyq mansabyn 1993 jyly Qazaqstan SІM Eýropa jáne Amerıka elderi basqarmasynyń attashesi qyzmetinen bastady.

Túrli jyldary Syrtqy ister mınıstrliginiń ortalyq apparatynda jáne elimizdiń Italııa, Shveıtsarııa, AQSh-taǵy shet elderdegi mekemelerinde túrli oryndaýshy jáne basshylyq laýazymdarda qyzmet atqardy.

2013 jyldan 2015 jylǵa deıin QR SІM Erekshe tapsyrmalar jónindegi Elshisi boldy.

2015 jylǵy jeltoqsanda Nıý-Iorkte BUU janyndaǵy Qazaqstannyń Turaqty ókiliniń orynbasary bolyp taǵaıyndaldy. Barlybaı Kárimulynyń Nıý-Iorkte jumys istegen kezeńi Qazaqstannyń BUU Qaýipsizdik Keńesine turaqty emes músheligimen tuspa-tus keldi. Onyń barysynda ol BUU Bas Assambleıasy jáne Qaýipsizdik keńesimen ózara is-qımyl máselelerine jetekshilik etti, sondaı-aq BUU Qaýipsizdik keńesi sanktsııalyq komıtetteriniń birqatar májilisterin ótkizgen.

Addıs-Abebaǵa qyzmetine taǵaıyndalǵanǵa deıin 2018 jylǵy qańtardan bastap Qazaqstannyń Pákistandaǵy Elshisi qyzmetin atqardy.

II synypty Tótenshe jáne Ókiletti Ýákil dıplomatııalyq dárejesi bar.

Aıta ketsek, jýyrda Aqordada Qazaqstan Prezıdentine eki memlekettiń tótenshe jáne ókiletti elshileriniń senim gramotalaryn tapsyrý rásimi ótti.